Ստամբուլի Թաքսիմ հրապարակում երեկ առավոտյան ոստիկանները ցրեցին ցուցարարներին, սակայն ճաշի ժամին ցուցարարներն ու օրենքի պահապանները դարձյալ նախկին վայրում էին և շարունակում էին «մուկն ու կատու» խաղալ, Թուրքիայում տեղի ունեցող իրադարձություններին է անդրադարձել լրագրող Էնդրյու Ֆինկելը՝ International Herald Tribune-ի բլոգում, որի նյութը թարգմանաբար ներկայացնում է InoPressa կայքը։
«Գլխավոր կատվի դերում ինքն Էրդողանն է (վարչապետ Ռեջեփ Թայիփ Էրդողան)։ Ելույթ ունենալով երկրի խորհրդարանում՝ վարչապետը խոսել է նեղացած, հայրական տոնով»,-նկատում է հեղինակը։
Հանրության շատ ներկայացուցիչներ՝ իմամներից մինչև միջնորդներ, էրդողանին կոչ են անում զիջումների գնալ, սակայն նա հասկացնել տվեց, որ չի պատրաստվում փոխվել։
Կառավարամետ լրատվամիջոցներն ու նրանց ընթերցողները հավաստիացնում են, որ բողոքի ակցիաների իրական նպատակը պետական հեղաշրջում նախապատրաստելն է։ Հեղինակը ենթադրում է, որ ցուցարարները մտածում են ինչի մասին ասես՝ բացի հեղափոխությունից։ «Նրանք չեն ցանկանում զավթել իշխանությունը, պարզապես ցանկանում են իշխանությանը սովորեցնել նորմալ պահել իրեն»,- նշում է նա։
Լրագրողը հիշեցնում է՝ Գեզի այգին կառուցապատելու որոշումը (բողոքի ակցիաների պատճառը) հակասում է դատարանի որոշմանը։ «Ցուցարարները ցանկանում են, որպեսզի կառավարությունը հաշվետու լինի հանրության առաջ, որ այն չառարկի, երբ մարդիկ երբեմն ալկոհոլ են օգտագործում, որպեսզի նրանք չվախեցնեն քաղաքացիներին»,-գրում է նա։
Կարո՞ղ է արդյոք ոստիկանությունը ցրել ցույցերի ոգին։ Իսկ գուցե չարժե՞ փորձել։ Ցուցարարները պարզապես մարտահրավեր չեն նետում Էրդողանին, նրան նաև ծիծաղելի դրության մեջ են դնում, ինչն ավելի վտանգավոր է, հավելում է նա։
«Այդ մարդիկ (ցուցարարները) օժտված են երևակայությամբ, հումորի զգացումով, ինքնուրույնությամբ։ Նրանք ապացուցել են, որ հենց իրենց նմաններից պետք է բաղկացած լինի «նոր» Թուրքիան՝ Էրդողանի կուսակցության խոստումը։ Եթե Էրդողանը չի հասկանում, թե ինչ են ուզում «Թաքսիմի երեխաները», դա նրանց խնդիրն է, նրանք հրաշալի գիտեն, թե ինչ են ուզում»,- եզրափակում է Ֆինկելը։
http://www.tert.am/am/news/2013/06/13/erdogan-cat/
Leave a Reply