Հունիսի 12-ին Ստամբուլի Թաքսիմ հրապարակում, նախնական տվյալների համաձայն, ոստիկանության և ցուցարարների միջև բախումների հետևանքով վիրավորվել է 3 լրագրող: Այս մասին հայտարարություն է տարածել «Լրագրողներ առանց սահմանների» միջազգային իրավապաշտպան կազմակերպությունը:
«Մեզ անհանգստացնում է այն վտանգավոր մթնոլորտը, որում լրագրողները լուսաբանում են Թուրքիայում տեղի ունեցող բողոքի ակցիաները»,- ասված է հայտարարության մեջ:
Ի պաշտպանություն մամուլի` կազմակերպությունն ընդգծել է, որ հակակառավարական ցույցերի սկսվելուց երկու շաբաթ անց արդեն լրագրողները բռնության և սպառնալիքների զոհ են դարձել: Հայտարարության մեջ թվարկվում են նաև յոթ թուրք և օտարերկրացի լրագրողների անունները, որոնք թունավորվել են արցունքաբեր գազով, գլխի հարվածներ են ստացել և ոստիկանության կողմից վիրավորվել Թաքսիմ հրապարակում:
Չորս հեռուստաալիքներ, որոնք Գեզի այգուց ուղիղ միացումներ են կատարել, խոշոր տուգանքների են ենթակվել, որը, ըստ կազմակերպության, արվել է լրագրողներին վախեցնելու նպատակով:
«Լրագրողներ առանց սահմանների» կազմակերպությունը կոչ է արել Թուրքիայի իշխանություններին հարգել խոսքի ազատությունը և ապահովել բողոքի ակցիաները լուսաբանող լրագրողների անվտանգությունը:
Leave a Reply