Մարդինի Սբ. Գևորգ հայկական եկեղեցին ճանաչվել է Եւրոպայի առավել վտանգված 7 հուշարձաններից մեկը

Եւրոպայի առավել վտանգված 7 հուշարձանների յոթնյակում է նաև Մարդինի (Արևմտյան Հայաստան, Դիարբեքիրի վիլայեթ, այժմ` Մարդինի վիլայեթի վարչական կենտրոնը) Սբ Գևորգ հայկական եկեղեցին` ներկայացված Թուրքիայի կողմից: Այս մասին Panorama.am-ին տեղեկացնում են ԻԿՕՄՕՍ/Հայաստան հասարակական կազմակերպության մամուլի ծառայությունից:

Աթենքում Եւրոպա Նոստրա կազմակերպության 50-ամյակին նվիրված հոբելյանական կոնգրեսի շրջանակներում հունիսի 11-ի հրավիրված մամուլի ասուլիսի ժամանակ «Եւրոպա Նոստրան» հրապարակել է Եւրոպայի առավել վտանգված հուշարձանների յոթնյակը: Այն ընդգրկում է մշակութային ժառանգության օրինակներ Ալբանիայից, Կիպրոսից, Ֆրանսիայից, Պորտուգալիայից, Իտալիայից, Ռումինիայից և Թուրքիայից:

Եւրոպա Նոստրայի տարածած մամուլի հաղորդագրության մեջ մասնավորապես ասված է. «Եւրոպայի մշակութային և բնության ժառանգության այդ գանձերը սպառնալից վիճակում են հայտնվել անհրաժեշտ ֆոնդերի կամ փորձաքննության բացակայության, վատ պլանավորման, անփութության, բնական աղետների և կամ քաղաքական կոնֆլիկտների հետևանքով»:

Եւրոպա Նոստրայի նախագահ Պլաչիդո Դոմինգոն իր խոսքում մասնավորապես ասել է. «Այս հուշարձաններն ու վայրերն ընտրվել են ոչ միայն այն պատճառով, որ դրանք պատմում են մեր ընդհանուր անցյալը, այլ նաև այն պատճառով, որ դրանք թանկ են դրանց պահպանության համար պարտավորություն կրող տեղական համայնքների համար»:

«Շուրջ 15 դարեր Սբ. Գևորգ եկեղեցին Մարդին քաղաքի մեծ հայ համայնքի հոգևոր օջախն է հանդիսացել: Պատմական հուշարձան դասակարգված այս շինությունը կառուցվել է 420թ. և օգտագործվել է հայ բնակչության կողմից մինչև 1915թ., մինչև հայերի կողմից քաղաքը լքելը», – ասված է «Եւրոպա Նոստրայի» պաշտոնական հաղորդագրության մեջ:

Միաժամանակ նշվում է, որ հուշարձանը փրկելու մտահոգությունը Եւրոպա Նոստրային է ներկայացրել Թուրքիայի Եւրոպա Նոստրան` Մարդինի կաթոլիկ հայ համայնքի հիմնադրամի աջակցությամբ:

«7 առավել վտանգված վայրեր» ծրագիրը մեկնարկել է 2013թ. հունվարին, որի շրջանակում 21 Եւրոպական երկրներ ներկայացրել են 40 թեկնածություններ: Այս ծրագրին աջակցում է Եւրոպայի հեղինակավոր ֆինանսական կազմակերպություններից մեկը` Եւրոպական ներդրումային բանկը:

http://panorama.am/am/culture/2013/06/13/ikomos/