Ստամբուլի կենտրոնում՝ Թաքսիմ հրապարակում, հունիսի 12-ի առավոտյան որոշակի խաղաղություն է հաստատվել։ Նախորդ գիշեր ոստիկանությունը կրկին կիրառել է արցունաքաբեր գազով նռնակներ և ջրաշիթ՝ ցույցերի մասնակիցներին հրապարակից ցրելու համար, հաղորդում է BBC-ն։
Ցուցարարների մեծ մասը տեղափոխվել է Թաքսիմին հարակից Գեզի այգի, հենց որի վերակառուցման ծրագրերով պայմանավորված էլ սկսվեցին զանգվածային ցույցերը, որոնք աստիճանաբար վերածվեցին հակակառավարական ելույթների ամբողջ երկրում։
Ոստիկանության հատուկ ջոկատների՝ ակտիվիստներին ցրելուց հետո հրապարակ են մտել բուլդոզերներ, որոնք սկսել են մաքրել բարիկադները, դրանց մնացորդները, ցուցարարների հիմնած ժամանակավոր կացարանները։
Ինչպես հաղորդում է Reuters-ը, Թաքսիմում վերականգնվել է ավտոմեքենաների երթևեկությունը, և նրանով ավելի քան երկու շաբաթ առաջ սկսված ցույցերից հետո առաջին անգամ սկսել են տաքսիներ երթևեկել։
Գեզի այգու վրանային ճամբարում մնացել են ոչ մեծ թվով ցուցարարներ, ենթադրաբար՝ մի քանի հարյուր մարդ։
Ստամբուլի նահանգապետ Հուսեյին Ավնի Մութլուն հունիսի 11-ին խոստացել էր, որ իշխանությունները կշարունակեն «մաքրել» քաղաքը «մարգինալ տարրերից» այնքան ժամանակ, քանի դեռ հրապարակը ամբողջությամբ բաց չի լինի բնակիչների համար։
Ինչպես հաղորդում է Euronews-ը, ցուցարարները չեն կորցնում կրկին Թաքսիմ վերադառնալու հույսը, սակայն վախենում են ոստիկանության նոր ակցիաներից։
Leave a Reply