Դինքի հիմնադրամը Դիարբեքիրի մասին էսսեների ժողովածու է հրատարակել

«Հրանտ Դինք» հիմնադրամի հրատարակչությունը թուրքերենով լույս է ընծայել 2011թ. նոյեմբերի 11-12-ը Դիարբեքիր քաղաքում «Դիարբեքիրի և տարածաշրջանի սոցիալ–տնտեսական պատմություն» համաժողովի շրջանակում ներկայացված էսսեների ժողովածուն, ասված է «Հրանտ Դինք» հիմնադրամի տարածած հաղորդագրությունում:

Գրքում ներկայացված են տարածաշրջանի վերաբերյալ թուրք և օտարերկրացի հետազոտողների 24 էսսեները: Գրքի կարևորությունը պայմանավորված է խաղաղ բանակցային գործընթացում ժողովածուի ունեցած ներդրմամբ:

«Հիշողությունը վերադառնում է այս հողեր: Այն գալիս է հեռվից` դեռ ազգերի ձևավորման ժամանակաշրջանից, որն ավելի քան մեկ դար առաջ էր: Իհարկե, այն, ինչը ազգերի ձևավորման գործընթացում պետության կողմից հարմարեցվել էր այս տարածքների բնակիչներին, ինչը բնակիչները հարմարեցրել էին իրենց, տանջանքները, հավաքական դաժանությունը, յուրաքանչյուր վատ հիշողություն, որ մոռացվել էր կամ` ավելի վատ, ստիպողաբար մոռացվել էր, այժմ վերադառնում է»,- գրքի շնորհանդեսին ասել է Ստամբուլի Բահչեշեհիր համալսարանի պրոֆեսոր, քաղաքագետ, «Հայերից ներողություն ենք խնդրում» արշավի նախաձեռնող անդամ Ջենգիզ Աքթարը` նշելով, թե այս գրքի հրատարակմամբ վերադառնում են «այս հողերի կրած կորուստները»:  

http://civilnet.am