Թուրքիայում արդեն 16-րդ օրն է շարունակվում են ցույցերն ու անկարգությունները։ Ինչպես տեղեկացնում է թուրքական «Հուրրիյեթը», երեկ վաղ առավոտյան սկսված ոստիկանական գործողությունը շարունակվել է մինչև ուշ գիշեր։
Արված հազարավոր լուսանկարների թվում կա մեկը, որը լայն արձագանք է գտել թուրք հասարակության շրջանում. լուսանկարում ճերմակած մազերով տարեց կին է՝ հակագազով, իսկ ձեռքին պարսատիկ՝ ոստիկանների ուղղությամբ քարեր նետելու համար։
Ոստիկանության ուղղությամբ քարեր և մոլոտովյան կոկտեյլներ նետողներին թուրքական իշխանությունները սադրիչներ են որակել և նախազգուշացրել, որ նման խմբերի հանդեպ խիստ են լինելու։
Երեկոյան Թաքսիմի հրապարակը դարձյալ լի է եղել հազարավոր խաղաղ ցուցարարներով, որոնց, սակայն, խանգարել են սադրիչները, և հրապարակը դարձյալ «մարտադաշտի» է վերածվել։
Թուրքական պարբերականները նշում են, որ երեկ քաղաքը ծածկված է եղել ծխով և արցունքաբեր գազով։
Այս ամենին դարձյալ արձագանքել են ԱՄՆ Սպիտակ տունն ու ՄԱԿ-ը։
Սպիտակ տան ազգային անվտանգության խորհրդի խոսնակը տարածած հաղորդագրության մեջ նշել է, որ անհանգստությամբ են հետևում տեղի ունեցող իրադարձություններին, և դարձյալ նշել, որ պետք է հարգվի ժողովրդի ազատ արտահայտվելու իրավունքը։
Leave a Reply