Ստամբուլի Գեզի այգու շուրջ տեղի ունեցող իրադարձությունների հետ կապված կարելի է մի քանի կարեւոր եզրակացություններ անել, որոնցից առաջինն այն է, որ թուրքական հասարակության որոշակի շերտեր հաղթահարել են վախը պետության հանդեպ: Այս մասին, հունիսի 10-ի մամուլի ասուլիսի ժամանակ նշեց ԳԱԱ Արեւելագիտության ինստիտուտի տնօրեն Ռուբեն Սաֆրաստյանը՝ հավելելով, որ տեղի ունեցողը աննախադեպ երեւույթ է Թուրքիայի Հանրապետության պատմության մեջ:
Երկրորդ եզրակացությունն, ըստ Սաֆրաստյանի, այն է, որ վերջին իրադարձությունները Թուրքիայում քաղաքական կյանքում կունենան իրենց հետեւանքները: «Ըստ էության, թուրք հասարակությունը դաս տվեց իշխող Արդարություն եւ զարգացում կուսակցությանը, այսինքն թեեւ այդ ուժը հաղթել է վերջին ընտրություններում, այսուհետ այն ստիպված կլինի հաշվի առնել ողջ հասարակության կարծիքը»,-ասաց թուրքագետը՝ ընդգծելով, որ այսպիսով Թուրքիայի քաղաքական կյանքը նոր փուլ կմտնի:
Երրորդ ասպեկտը, ըստ Սաֆրաստյանի, պետք է քննարկել քաղաքական հաշվարկների համատեքստում: Գաղտնիք չէ, որ 2014-ին Թուրքիայում տեղի են ունենալու նախագահական եւ տեղական ինքնակառավարման մարմինների ընտրություններ: «Երկրի ներկա վարչապետ Էրդողանը ինքն է ցանկանում դառնալ նախագահ, սակայն վերջին իրադարձությունները ցույց տվեցին, որ նա չի կարող հանդես գալ որպես երկրի նախագահ: Նրա վիրավորական արտահայտություններն ու վարքը ցուցարարների հանդեպ մեծ հարված հասցրին եւ հասցնում են նար վարկանիշին»,-նշեց թուրքագետը՝ հավելելով, որ այդ ամենից կշահի Թուրքիայի ներկա նախագահ Աբդուլլահ Գյուլը:
Նա ընդգծեց, որ Թուրքիայում իրադարձությունների զարգացման 4-րդ ասպեկտը վերաբերում է երկրի իսլամացման քաղաքականությանը, որը մեծ քանակությամբ կողմնակիցներ ունի, սակայն հասարակության որոշակի մասը դեմ է դրան: «Այդ մասին են վկայում կարգախոսները, որոնք հայտնվել էին հակակառավարական ցույցների ժամանակ»,-ամփոփեց Սաֆրաստյանը:
Հիշեցնենք, որ Թուրքիայում, ավելի քան մեկ շաբաթ է, չեն դադարում բողոքի ակցիաները, որի մասնակիցները պահանջում են Էրդողանի հրաժարականը: Հուզումների ընթացքում զոհվել է 3, վիրավորվել առավել քան 4 հազար մարդ, 2,3 հազարից ավելի մարդ էլ ձերբակալվել է:
Լուսանկարն՝ Արսեն Սարգսյանի
Leave a Reply