Թուրքիայում բախումները շարունակվում են. ոստիկանությունը ցանկանում է մաքրել Թաքսիմը

Գիշերը Ստամբուլում և Անկարայում անհանգիստ է եղել։ Հաղորդագրություններ են ստացվում այն մասին, որ ցուցարարների և ոստիկանության միջև նոր բախումներ են տեղի ունեցել, տեղեկացնում է vesti.ru-ն։ Զոհերի և տուժածների մասին տեղեկություններ չկան։

Ցույցերի պատճառ է դարձել վարչապետ Ռեջեփ Թայիփ Էրդողանի ելույթը։ Նա կողմնակիցների հետ մի քանի հավաք է անցկացրել և հայտարարել, որ իր համբերությունն անսահման չէ։

Ավելի վաղ նա ցուցարարներին թալանչի էր որակել, սակայն հետո փոխել էր տոնը և որոշել առաջին անգամ դիմել ցուցարարներին։ Չնայած ցուցարարներից շատերն արդեն կարծում են, որ վարչապետի հետ խոսելու ոչինչ չունեն։
Ակցիայի մասնակիցները շարունակում են մնալ Ստամբուլի Թաքսիմ հրապարակում։

BBC-ն տեղեկացնում է, որ թուրքական ոստիկանության հատուկ ստորաբաժանումներն այժմ մտել են Թաքսիմ հրապարակ, որտեղ, արդեն երկրորդ շաբաթն է, ցույցերը չեն դադարում։

Ոստիկանությունը ցուցարարներին ցրելու համար արցունքաբեր գազ և ջրի շիթեր է կիրառում։

Թուրքական «Հյուրրիյեթը» տեղեկացնում է, որ թուրք ոստիկանները Թաքսիմ հրապարակ են մտել առավոտյան՝ տեղական ժամանակով 07։30-ին։ Ոստիկանությունը բարձրախոսներով հայտարարել է, որ իրենց նպատակը Գեզի պուրակի ցույցին միջամտելը չէ, այլ հրապարակում հուշարձանի շրջակայքը մաքրելը (ի նկատի ունի ցուցապաստառներից)։

Ցուցարարները, սակայն, մոլոտովյան կոկտեյլներ և քարեր են նետել ոստիկանության ուղղությամբ։
Ոստիկանությունը հաճախ հայտարարում է՝ «քար մի նետեք, ջուր չկիրառենք»։

http://www.tert.am/am/news/2013/06/11/taksim/