Աթենքի կենտրոնում թուրքական գաղտնի ծառայությունները առեւանգել են քրդին, նրան փաթեթավորել եւ Թուրքիա տեղափոխել. «Հայաստան»

Հունական defencenet.gr կայքը հունիսի 2-ին հրապարակել է թուրքական գաղտնի ծառայությունների` Աթենքի կենտրոնում կազմակերպած գործողության մասին բացահայտում, որն ամբողջությամբ ներկայացնում է Աթենքում լույս տեսնող «Հայաստան» թերթը:

«Թուրքիայի գաղտնի ծառայությունները Աթենքի կենտրոնում կազմակերպեցին ծագումով քուրդ Թուրքիայի քաղաքացու առեւանգումը` ապացուցելով, որ նրանց ոչինչ չի կանգնեցի հենց Հունաստանի ներսում նման «զգայուն» գործողություններ իրականացնելուց:

Ինչպես հաղորդում են հունական հետախուզական լավ իրազեկված աղբյուրները, թուրքական «կոմանդոական» մի խումբ, այսինքն թուրքական ծառայություների՝ ՄԻԹ-ի կողմից հատուկ պատրաստված մի ջոկատ Հունաստան է ժամանել եւ Աթենքում գործող իրենց ծառայության գործակալների հետ համատեղ ոչ միայն հաջողացրել են առեւանգել, այլ նաեւ հաշված ժամերի ընթացքում Թուրքիա տեղափոխել քրդական ծագումով Թուրքիայի քաղաքացուն, որն իբր թե բավականաչափ տեղեկություններ ուներ հարեւան երկրում մի «դավադրական» ծրագրի մասին:

Առեւանգված անձին հաջողել էր փախչել Թուրքիայի բանտից, որտեղ նրան ենթարկել էին դաժան խոշտանգումների՝ խոստովանություն կորզելու նպատակով, ինչը չէր հաջողվել:

Այնուհետ քուրդ փախստականների խմբի միջոցով նա կարողանում է 2 ամիս առաջ ապաստանել Հունաստանում:

Ակնհայտորեն հունական եւ ոչ մի ծառայություն նրանով չի զբաղվել, քանի որ հավանաբար չգիտեին տվյալ անձի կարեւորության մասին եւ նրան թույլատրեցին առանց ոստիկանական պաշտպանության ազատ շրջագայելու:

Անցյալ հինգշաբթի, մայիսի 30–ի երեկոյան, երբ քուրդը քայլում էր Աթենքի կենտրոնում՝ Սոլոնոս փողոցով դեպի Կանինգոս հրապարակ, թաղամաս, որտեղ, հարակից լինելով «էքսարխիա» թաղամասին, գործում է ուժեղացված ոստիկանական վերահսկողություն, մի մեքենա է կանգնում նրա կողքին, թուրք գործակալները մեքենայից իջնում, նրան կալանավորում, եւ ինչպես վկայում են ականատեսները, նրան նետում են մեքենայի մեջ, գլխին տոպրակ հագցնում եւ անհետանում անհայտ ուղղությամբ:

Շաբաթ երեկոյան Ցամադու փողոցի վրա գտնվող Փախստականների եւ գաղթականների հարցերով զբաղվող գրասենյակի մամլո ասուլիսով պարզ դարձավ, որ Թուրքիայի քաղաքացին առեւանգումից ժամեր անց՝ ուրբաթ առավոտյան, հայտնվել է Ստամբուլի հակաահաբեկչական ծառայությունում, որտեղ հարցաքննում են նրան:

Այս դեպքը շատ նման է Օջալանի գործին, սակայն այս անգամ առեւանգումը տեղի չի ունեցել Քենիայում, այլ` Աթենքի կենտրոնում:

Ուրբաթ լուսաբացին Էքսարխիա թաղամասի ոստիկանության բաժանմունքում իրազեկել են տվյալ անձի անհետացման մասին եւ շաբաթ կեսօրին առեւանգման մասին հայց է ներկայացվել: Հունաստանի ոստիկանությունը տվյալ գործի քննությունը փոխանցել է Աթենքի Անվտանգության ծառայության ստորաբաժանմունքին:

Ըստ տեղեկությունների, տվյալ անձը Հունաստան էր եկել մոտ 2 ամիս առաջ եւ ներկայացել Փախստականների հարցերով զբաղվող հունական գերատեսչությանը, ուր տվել է իր տվյալները, որոնց հիման վրա 3 շաբաթ առաջ գերատեսչությունը համապատասխան մարմիններին է ուղարկել նրա գործը՝ քանի որ հիմքեր կային նրան ապաստանյալի կարգավիճակ տրամադրելու համար:

Նույն աղբյուրի համաձայն, Փախստականների հարցով զբաղվող հունական գերատեսչությունն արդեն իսկ հայց է ներկայացրել Ստրասբուրգում Մարդու իրավունքների եվրոպական դատարան:

Ակնհայտ է, որ տվյալ անձը «շատ բան» գիտեր, եւ մինչ հունական ծառայությունները գաղափար չունեին թե ում հետ գործ ունեն, եւ այդ իսկ պատճառով նրան պատշաճ ուշադրության չէին արժանացրել, թուրքական ծառայությունները պատրաստ եղան ռիսկային գործողություն ձեռնարկել Աթենքի կենտրոնում՝ առեւանգել նրան եւ Թուրքիա ուղարկել:

Ուշագրավ է այն հանգամանքը, թե ինչպես Թուրքական գաղտնի ծառայությունը (ՄԻԹ) կարող է Սոլոնոս փողոցում առեւանգում կազմակերպել եւ առանց ամենափոքր խոչընդոտի անձին Թուրքիա տեղափոխել»:

http://news.am/arm/news/157015.html