Հրանտ Դինքի փողոց, Մանուկյան պարտեզ, հայկական գերեզմանոցի խորհրդանիշ՝ Ստամբուլի ցույցերի ֆոնին

Թուրքիայի Ստամբուլ քաղաքի Գեզի պուրակում Հրանտ Դինքի անունով փողոց է անվանակոչվել, տեղեկացնում է Biyanet-ը։

Նույն փողոցում խորհրդանշական գերեզման է տեղադրվել. այն խորհրդանշում է այգու տարածքում նախկինում եղած և վերացած հայկական Սուրբ Հակոբ գերեզմանատունը։

«Բոլորս Հրանտ ենք, բոլորս հայ ենք» վանկարկել են ցուցարարները և «բացել» Հրանտ Դինքի փողոցը։ Հենց այդտեղ էլ «Նոր Զարթոնք» նախաձեռնության կողմից խորհրդանշական գերեզման է տեղադրվել, որի վրա գրված է. «1551-1939. մեր գերեզմանը խլեցիք, մեր այգին չեք կարող վերցնել»։

Ստամբուլի Բեյօղլու թաղամասում էլ լքյալ մի տարածք ցուցարարների խմբի կողմից մաքրվել և «հանրայնացվել է» ու վերածվել զբոսայգու, որն անվանակոչվել է «Մանուկյան այգի»։
Այգու հայ սեփականատիրոջ մահվանից հետո այն ժառանգելու շուրջ վեճ է ծագել, ինչից հետո այգին շրջափակված է եղել փայտե պարիսպներով։

Այժմ ցուցարարներն այգու պատին պաստառ են փակցրել և նշել են այգու նոր անունը՝ «Մանուկյան այգի»։

http://www.tert.am/am/news/2013/06/06/stambul-hrant-dink/