Հռոմի պապը ճանաչել է Հայոց ցեղասպանությունը

Երկուշաբթի օրը Վատիկանում Կիլիկիայի հայ կաթոլիկների կաթողիկոս-պատրիարք Ներսես Պետրոս XIX-ի գլխավորած պատվիրակության հետ հանդիպման ժամանակ Հռոմի Պապ Ֆրանցիս I-ը կրկին ասել է, որ ճանաչում է Հայոց ցեղասպանությունը:

Այցի ընթացքում Հռոմի Պապը հանդիպել է պատվիրակության անդամներին: Նրանցից մեկն ասել է, որ Ցեղասպանության զոհերի ժառանգ է, իսկ Պապը պատասխանել է. «20-րդ դարի առաջին ցեղասպանությունը հայերի ցեղասպանությունն է»: Այն ժամանակ, երբ նա գլխավորում էր Բուենոս Այրեսի կաթոլիկ եկեղեցին, որպես Կարդինալ Ջորջ Մարիո Բերգոլիո, ճանաչել էր Հայոց ցեղասպանությունը:

Յոթ տարի առաջ, Բուենոս Այրեսում, Հայոց ցեղասպանության 91-րդ տարելիցին նվիրված միջոցառումներից մեկի ժամանակ Բուենոս Այրեսի արքեպիսկոպոս Ջորջ Մարիո Բերգոլիոն կոչ էր արել Թուրքիային ճանաչել Հայոց ցեղասպանությունը և ընդունել, որ դա Օսմանյան կայսրության կողմից իրականացրած ծանրագույն հանցագործությունն էր` ընդդեմ հայ ազգի և ամբողջ մարդկության:

Հարավային Ամերիկայի Հայ դատի հանձնախմբի տնօրեն Ալֆոնսո Թաբակյանն ասել է, որ Հռոմի Պապի կարգավիճակում սա Ֆրանցիս I-ի առաջին հայտարարությունն էր:

Թաբակյանն ասել է, որ այդ հայտարարությունը շատ կարևոր է:

http://www.slaq.am/arm/news/136600/