Ստամբուլի «Gezi» այգու պահպանության համար սկսված ցույցերը, որոնք վերածվեցին հակակառավարական զանգվածային ելույթների, մեծ արձագանք գտան աշխարհի շատ երկրներում: Թուրքիայում տիրող իրավիճակի մասին իրենց կարծիքը հայտնեցին մեծ պետությունների առաջնորդները:
Ինչպես հաղորդում է թուրքական «Radikal»-ը, Ռուսաստանի նախագահ Վլադիմիր Պուտինը Թուրքիայում տեղի ունեցող վերջին իրադարձությունների վերաբերյալ նշել է. «Ուզում ենք, որ Թուրքիայի ղեկավարությունը, երկխոսություն սկսելով ընդդիմության և հասարարկական կազմակերպությունների հետ, լուծում գտնի ներքին խնդիրների համար»: Հարցի առնչությամբ մեկնաբանությամբ էր հանդես եկել նաև Պուտինի խոսնակ Դմիտրի Պեսկովը: «Թուրքիայում տեղի ունեցող դեպքերին դրսից Ռուսաստանի միջամտության կարիքը չկա: Դրանք Թուրքիայի ներքին խնդիրներն են: Ռուսաստանը հարցի վերաբերյալ պաշտոնական հայտարարությամբ հանդես չի գա»,-նշել էր նա:
Ինչ վերաբերում է ԱՄՆ-ին, ապա Սպիտակ տունը իրադարձությունների ծավալման հենց առաջին օրը՝ ուրբաթ գիշերը, հանգստության պահպանման կոչ էր արել: Երեկ Սպիտակ տունը կրկնեց իր այդ կոչը՝ հայտարարելով, որ Թուրքիան պետք է անվտանգություն ապահովի հավաքներ և քայլերթեր կազմակերպելու նման հասարակական հիմնական իրավունքների համար: ԱՄՆ-ի պետքարտուղար Ջոն Քերին էլ հայտնել էր, որ իրենք վշտացած են լուրերի փոխանցած այն տեղեկությունների պատճառով, թե Թուրքիայում ոստիկանությունը կոպիտ ուժ է գործադրում ցուցարարների նկատմամբ:
Սիրիան իր առաջին մեկնաբանությամբ վարչապետ Էրդողանին մեղադրեց սեփական ժողովրդին ահաբեկելու մեջ: «Եղբայր թուրք ժողովուրդը արժանի չէ նման բարբարոսության»,-այսպիսի արձագանք էր հնչել Սիրիայից:
Մեծ պետություններից Գերմանիան, ի դեմս կանցլեր Անգելա Մերկելի, նշել էր, որ իրավական պետությունը ենթադրում է անվտանգության ուժերի համաչափ և համապատասխան գործողությունների իրականացում: Մերկելը ևս հավասարակշռության պահպանման կոչ էր արել:
Եվրախորհրդարանի Կանաչների խումբն էլ, գնահատելով Թուրքիայում տիրող իրավիճակը, հայտնել էր` որպեսզի ժողովրդավարությունը ավելի հետընթաց չապրի, անհրաժեշտ է, որ հաղթի փոխզիջման ոգին:
Leave a Reply