Ստամբուլի Թաքսիմ հրապարակում բողոքի ցույցերի չորրորդ օրը նախկինի պես շարունակում են մնալ հարյուրավոր ցուցարարներ։ Թուրքական արհմիությունները հունիսի 4-ից հայտարարել են երկօրյա գործադուլ՝ բողոքելով ցուցարարներին ցրելու փորձերում ուժի կիրառման դեմ, հաղորդում է BBC-ն։
Ցույցերը սկսվել են մայիսի 31-ի ուշ երեկոյան։ Դրանց պատճառ են դարձել Թուրքիայի իշխանությունների՝ Ստամբուլի Գեզի այգին քանդելու և նրա տեղում առևտրաժամանցային համալիր կառուցելու ծրագրերը։ Երիտասարդ շատ ցուցարարներ կառավարությանը մեղադրում են ավտորիտարության և երկրի իսլամացման մեջ։
Ոստիկանությունը կիրառել է ջրաշիթ և արցունքաբեր գազ։ Հաղորդվում է, որ մեկ մարդ զոհվել է ցույցի ժամանակ Անթաքիա քաղաքում՝ երկրի հարավում։ Հարյուրավոր մարդիկ տարբեր քաղաքներում ստացել են վնասվածքներ։ Եվս մեկ ցուցարար մահացել է ստամբուլյան հիվանդանոցում։ Նա մարմնական վնասվածքներ էր ստացել հունիսի 3-ին, երբ ավտոմեքենան բախվել էր ցուցարարների խմբին։
Թուրքիայի վարչապետ Ռեջեփ Թայիփ Էրդողանը քննադատել է ցուցարարներին և նրանց ակցիաներն անվանել է հակաժողովրդավարական։
Leave a Reply