Կիրակի լույս երկուշաբթի գիշերը Թուրքիայի քաղաքներում շարունակվել են հակակառավարական ցույցերը: Իզմիրում ընդդիմադիրները դյուրավառ հեղուկով շշեր են նետել Արդարություն և զարգացում իշխող կուսակցության գրասենյակի վրա, ինչի հետևանքով շինությունում հրդեհ է բռնկվել, որը հաջողվել է մարել, հաղորդում է Reuters-ը:
Ոստիկանության հետ ամենադաժան բախումները տեղի են ունեցել Ստամբուլի Բեշիքթաշ շրջանում, որը տեղակայված է Բոսֆորի ափին: Ոստիկանությունը արցունքաբեր գազ և ջրցաններ է կիրառել ցուցարարների դեմ:
Թուրքիայի վարչապետ Ռեջեփ Թայիփ Էրդողանի ստամբուլյան նստավայր տանող ճանապարհները փակ են: Ցուցարարները փորձել են հասնել այդ կառավարական շենքին, սակայն ոստիկաններին հաջողվել է կանգնեցնել նրանց՝ արցունքաբեր գազի միջոցով:
Մոտակա մզկիթներում, խանութներում և համալսարանում հերթապահել են բժիշկներ, որոնք օգնել են անկարգությունների ընթացքում տուժածներին:
Ցույցերը շարունակվել են նաև երկրի մայրաքաղաք Անկարայում: Այստեղ ոստիկանությունն իր վերահսկողության տակ է վերցրել առևտրի կենտրոնը, որտեղ թաքնված են եղել ցուցարարները: Այս շինությունում ձերբակալվել է մի քանի հարյուր մարդ:
Leave a Reply