Ուխտագնացություն դեպի Մալաթիա

Մալաթիայում հայերի վերջին աղոթատունը կբացվի հունիսի 29-ին:

Այդ մասին հաղորդում է Akunq.net-ը` վկայակոչելով թուրքական «Իհլաս» լրատվական գործակալությանը: Աղբյուրի համաձայն` Մալաթիացի բարերար հայերի մշակույթի և համերաշխության միության (Malatya HAYDer) նախագահ Խոսրով Քյոլեթավիթօղլուն գրավոր հայտարարությամբ հայտնել է.

«2012 թ. փետրվարի 2-ին Մալաթիայի քաղաքապետարանի աշխատակիցների կողմից սխալմամբ լիովին քանդված Մալաթիայի հայկական գերեզմանատան մեջ գտնվող վերջին աղոթատեղիի և պահակատան շինարարությունն օրերս ավարտին կհասցվի: Մեր միության` դեպի Մալաթիա կազմակերպելիք ուխտագնացության շրջանակներում 2013 թ. հունիսի 29-ին` շաբաթ օրը, մի հոգևորականի մասնակցությամբ կկայանա հոգեհանգիստ, և աղոթատունը կբացվի»:

Ըստ Մալաթիացի բարերար հայերի մշակույթի և համերաշխության միության (Malatya HAYDer) ծրագրի` 2013 թ. հունիսի 29-ի առավոտյան ուխտագնացները կհասնեն Մալաթիա, ժամը 16:00-ին այց կկազմակերպվի Մալաթիայի գերեզմանատուն, և վերջին աղոթատանը կկատարվի հավաքական աղոթք: Հունիսի 30-ից մինչև հուլիսի 4-ը, ուխտագնացության ծրագրի շրջանակներում, ուխտավորները կշրջեն Մալաթիայի պատմական տեսարժան վայրերում, որով էլ այցը կավարտվի: 2013 թ. հուլիսի 4-ին` հինգշաբթի երեկոյան, խումբը կմեկնի Մալաթիայից:

Akunq.net