Թուրքիայում վերանորոգում են դեպի Հայաստան ձգվող երկաթուղին

Թուրքիայի իշխանությունները վերանորոգում են դեպի Հայաստանի սահման ձգվող 112 կմ երկարությամբ երկաթուղին, որի աշխատանքներին ծանոթանալու համար Չաթաք գյուղ է  մեկնել իշխող «Արդարություն եւ զարգացում» կուսակցության Կարսից ընտրված պատգամավոր Ահմեդ Արսլանը։

Ինչպես փոխանցում են Կարսի տեղական լրատվամիջոցները, Հայաստանի հետ սահմանակից Աքյաքայի սահմանակետ ձգվող երկաթուղու վերանորոգման աշխատանքներին հետեւելու համար աշխատանքների իրականացման վայր մեկնած «Արդարություն եւ զարգացում» կուսակցության պատգամավոր Ահմեդ Արսլանից լրագրողները հետաքրքրվել են, թե վերանորոգումն արդյոք կապվա՞ծ է Հայաստանի հետ սահմանը բացելու հետ։

Թուրք պատգամավորը նշել  է, թե ինքը եւս Աքյաքայի բնակիչների չափ ուզում է, որ Հայաստանի հետ սահմանը բացվի, որի արդյունքում կզարգանա փոխադարձ առեւտուրը։ «Սակայն մի իրականություն կա, որ մինչ եղբայր Ադրբեջանի «հողերը բռնազավթված են» եւ այդ խնդիրը չի լուծվել, սահմանի բացումը չի լինի։ Հայաստանի քաղաքացիները եւս Թուրքիայի քաղաքացիների պես ցանկանում են, որ սահմանը բացվի, սակայն մենք ուզում ենք, որ Ղարաբաղի հարցը լուծվի, որ Հայաստանի եւ Ադրբեջանի միջեւ լավ հարաբերություններ ստեղծվեն», նշել է թուրք պատգամավորը՝ շեշտելով, թե այդ երկաթուղուն այլընտրանք կառուցվում է Կարս-Թբիլիսի-Բաքու երկաթգիծը։

http://news.am/arm/news/155978.html