Թուրքիայի Հանրապետությունում ամենաշատ մզկիթները կառուցել է հայազգի Ստեփան Արաթանը

Թուրքիայի Հանրապետությունում ամենաշատ մզկիթները կատուցել է հայ ճարտարապետ Ստեփան Արաթանը: Այս մասին, ինչպես հաղորդում է «Արմենպրես»–ը, հայտնում է թուրքական «Հուրիեթ» թերթը: Ճարտարապետը 1993 թ. պարգեւատրվել է Թուրքիայի հուշարձանների միության արծաթե մեդալով, հանձնվել է շնորհակալագիր` երկրի տարբեր վայրերում կառուցած մզկիթների, կրոնական ու հուշարձանային այլ նախագծեր իրագործելու միջոցով թուրքական ճարտարապետական արվեստին մեծ ծառայություններ մատուցելու համար: 

1929 թ. ծնված Արաթանը երկար տարիներ մաթեմատիկա է դասավանդել Ստամբուլի հայկական Կեդրոնական վարժարանում եւ Սուրբ Խաչ Դպրեվանք հայկական վանական դպրոցում: Թուրքիայի տարածքում նրա կառուցած բազմաթիվ մզկիթների եւ ճարտարապետական այլ հուշարձանների մեջ ամենաճանաչվածները Ստամբուլի Շիշլի թաղամասի, Նիմեթ Աբլայի եւ Սողութլուչեշմեի մզկիթներն են: 

Թերթն ուշադրության է հրավիրում Թուրքիայի վարչապետ Ռեջեփ Թայիփ Էրդողանի` օրերս հնչեցրած այն հայտարարությանը, թե «մզկիթի ճարտարապետի հարցում կարեւոր է նրա մահմեդական լինելը, քանի որ ոչ մահմեդականի համար դժվար է որսալ այդ հավատքի ոգին», ինչի համար էլ Ստամբուլում կառուցվելիք ամենամեծ մզկիթի համար միջազգային հայտամրցույթ չի հայտարարվելու: «Ճարտարապետը պետք է կարողանա հասկացնել, թե ինչ եւ ինչու է կառուցել: Մեծն Սինանը դա կարողացել է եւ 600-ից ավելի հուշարձաններ է թողել մեզ: Արեւմուտքի ոգու աշխարհում թուրքերին պատկանող մշակույթ չկա: Այդ պատճառով էլ ոչ մահմեդականի համար մզկիթի ոգին հաղորդելը հեշտ չէ», -ասել էր նա:

«Լավ, իսկ ինչ՞ կասեք ազգությամբ հայ մեր քաղաքացի Ստեփան Արաթանի նախագծերի մասին: Գերմանիայի Քյոլն քաղաքում Թուրքիայի կրոնական նախարարության կողմից կառուցվող Եվրոպայի ամենամեծ մզկիթի նախագծի հեղինակը եկեղեցիների ճարտարապետ գերմանացի Պաուլ Բյոհմն է: Ինչու՞ ենք մենք մեզ անընդհատ «հղկում»` իրականությունն անտեսելով», – նկատում է թերթը:

Էրդողանը մոռացել է, որ Օսմանյան կայսրության գլխավոր ճարտարապետ, օսմանյան ճարտարապետության հիմնադիր եւ ռահվիրա Սինանը, ում կառուցած մզկիթներում են աղոթում իր ժամանակակիցները, նույնպես ազգությամբ հայ էր:

http://armenpress.am/arm/news/709796/turqiayi-hanrapetutyunum-amenashat-mzkitnery-karucel.html