Բոլոր ֆիզիկական ճնշումներին նախորդում է մշակութային ցեղասպանությունը: Այս մասին, փետրվարի 26-ին կայացած մամուլի ասուլիսում հայտարարել է Եվրոպայի հայկական ասոցիացիաների ֆորումի նախագահ Աշոտ Գրիգորյանը:
«Մենք շարունակում ենք մեր պայքարը հանուն Հայոց ցեղասպանության ճանաչման, ինչպես նաեւ պայքարում ենք ՅՈՒՆԵՍԿՕ-ում` Հին Ջուղայի գերեզմանոցի խաչքարերի ոչնչացման հարցում:
Ադրբեջանը ՅՈՒՆԵՍԿՕ-ին 1,5 մլն դոլար է վճարել, եւ մենք պարտադիր կբողոքենք այդ կազմակերպության գլխավոր տնօրեն Իրինա Բոկովային»,-ասել է Գրիգորյանը:
Միաժամանակ, փորձագետն ընդգծել է, որ իրենք նամակ են հղել ՄԱԿ-ի գլխավոր քարտուղար Բան Կի-Մունին` պահանջելով ՅՈՒՆԵՍԿՕ-ին կից հանձնաժողով ստեղծել, որի աշխատանքի շրջանակներում կճանաչվի ադրբեջանցիների կողմից 10 հազար խաչքար-հուշարձանների ոչնչացման փաստը, որոնց գտնվելու վայրում հիմա հրաձգարան են կառուցել:
«Մեկ այլ խնդիր է Բրիտանական թանգարանը: Այստեղ ներկայացված են հայկական ցուցանմուշներ` «Հին Թուրքիա» գրառմամբ»,-նշել է Գրիգորյանն ու հավելել. «Դեռ որքա՞ն ժամանակ սփյուռքը պետք է զբաղվի այն խնդիրներով, որոնց համար ի սկզբանե պատասխանատու է Մշակույթի նախարարությունն ու Հայաստանի պատմության ինստիտուտը»:
Leave a Reply