Արամ Աթեշյանն Անգելա Մերկելին է ներկայացրել պոլսահայ համայնքի խնդիրները

2013 թ. փետրվարի 25-ին Թուրքիայի կառավարության շենքում վարչապետ Ռեջեփ Թայիփ Էրդողանի և Գերմանիայի կանցլեր Անգելա Մերկելի հետ հանդիպմանը մասնակցել են նաև Թուրքիայի կրոնական փոքրամասնությունների առաջնորդները:

Պոլսո հայոց պատրիարքարանը տեղեկություններ է հաղորդել շուրջ 20 րոպե տևողությամբ սույն հանդիպման մասին, հաղորդում է Ստամբուլում թուրքերենով և հայերենով հրատարակվող «Ակօս» հայկական շաբաթաթերթը:

Աղբյուրի փոխանցմամբ` հանդիպմանը, որպես հայկական համայնքի ներկայացուցիչ, մասնակցել է Պոլսո հայոց պատրիարքարանի ընդհանուր փոխանորդ Արամ Աթեշյանը: Ներկա են գտնվել նաև Անկարայի մյուֆթի Մ. Հաքքը Օզերը, հունաց պատրիարք Բարդուղիմեոսը, հրեական համայնքի գլխավոր ռաբբի Իսաք Հալեվան, ասորական Մոր Գաբրիել վանքի մետրոպոլիտ Սամուել Աքթաշը և այլք:

Պատրիարքարանից ստացված տեղեկության համաձայն` արքեպիսկոպոս Արամ Աթեշյանը Պոլսո հայոց պատրիարքարանի և հայկական համայնքի անունից անդրադարձել է պոլսահայ համայնքին հուզող խնդիրներին: Աթեշյանն ընդգծել է, որ Պոլսո հայոց պատրիարքարանը զուրկ է իրավաբանական անձի կարգավիճակից, և անդրադարձել դրանից բխող խնդիրներին: Սրբազանը նաև շեշտել է, թե այդ պատճառով պատրիարքարանն անհրաժեշտության դեպքում չի կարողանում միջամտել հայկական եկեղեցիների հոգևոր խորհուրդների աշխատանքներին:

Արքեպիսկոպոս Արամ Աթեշյանը նույն գիշեր ինքնաթիռով Անկարայից վերադարձել է Ստամբուլ:

Akunq.net