Թուրքիան Հայաստանին առաջարկել է մասնակցել տրանսպորտային կարևոր նախագծի իրականացման. «Հյուրիյեթ»

«Թուրքիան, ղարաբաղյան հակամարտության կարգավորման հարցում կոնկրետ առաջընթաց արձանագրելու դիմաց, Հայաստանին առաջարկել է մասնակցել Եվրոպան Ասիային կապող տարածաշրջանային տրանսպորտային մի նախագծի իրականացման»,-գրում է թուրքական «Հյուրիյեթ դեյլի նյուզ» պարբերականը՝ վկայակոչելով դիվանագիտական անանուն աղբյուրները:
Աղբյուրը պարբերականի հետ զրույցում ընդգծել է, որ Անկարան ամիսներ առաջ այդ ծրագիրը  ներկայացրել է ԼՂ հիմնախնդրի կարգավորմամբ զբաղվող ԵԱՀԿ Մինսկի խմբի (ԱՄՆ, Ֆրանսիա, Ռուսաստան) «դատին»: «Մենք փորձում ենք ակտիվացնել ԵԱՀԿ Մինսկի խմբի գործունեությունը՝  ԼՂ հակամարտության կարգավորմանը հասնելու համար: Մենք 2012թ. նոյեմբերին Մինսկի խմբին ենք ներկայացրել Միացյալ տրանսպորտային միջանցքների կառուցման ծրագիր: Այն (ծրագիրը), սակայն, կյանքի կկոչվի՝  տարածաշրջանում խաղաղություն հաստատվելուց և, մասնավորապես,  այն բանից հետո, երբ Հայաստանը «դուրս գա» Լեռնային Ղարաբաղին հարակից, օկուպացված 7 շրջաններից,-նշել է աղբյուրը և հավելել,- Մենք առաջարկում ենք Թուրքիա-Հայաստան և Հայաստան- Ադրբեջան հարաբերությունների ամբողջական կարգավորում»:

Թուրքիան ծրագիրը  Մինսկի խմբի համանախագահող երկրներին է ներկայացրել Վիեննայում (Ավստրիա, 2012թ.) կայացած հանդիպման ժամանակ: «Այն դրական արձանաքի արժանացավ Մինկի խմբի երիկրների կողմից, մենք հստակ նրանց ասացինք, որ մեր նպատակն է ստեղծել խաղաղության հեռանկար՝  շահագրգիռ բոլոր կողմերի համար»,-նշել է աղբյուրը:
«Առաջարկվող տրանսպորտային նախագիծը բաղկացած է երկու փուլից: Մի կողմից, այն նախատեսում է չօգտագործվող երկաթուղիների վերանորգման, ինչպես նաև նոր երկաթուղիների կառուցման միջոցով Թուրքիան, Հայաստանը, Ադրբեջանն ու Ռուսաստան կապել իրար: Բաքու-Կարս-Թբիլիսի երկաթուղուն (մեկնարկը տրվել է 2007թ., նախագծի շրջանակում նախատեսվում էր կառուցել 98 կմ երկարություն ունեցող երկաթգիծ, որը սկսվելու է Թուրքիայի Կարս քաղաքից և ավարտվելու վրացական Ախալքալաքում-Tert.am ) զուգահեռ, որի շինարարությունը նախատեսվում է ավարտել այս տարեվերջին, որոշակի վերանորոգումից հետո կարող է վերաբացվել նաև Թուրքիա-Հայաստան երկաթուղին։ Այս երկաթուղու վերաբացումից բացի, քննարկվում է նաև ժամանակակից ավտոմայրուղի կառուցելու հարցը, որը կնպաստի երկու երկրների միջև ուղևորափոխադրումների և առևտրաշրջանառության աճին»,-հայտնել է աղբյուրը:

Թուրք (նույն անանուն աղբյուրը) պաշտոնյան նշել է նաև, որ երկաթուղիների երկայնքով նաև բնակելի շինություններ են կառուցվելու. «Մենք նախատեսում ենք նաև կառուցել բնակելի շրջաններ, այդ երկաթուղիների երկայնքով  բնակելի տարածքների շինարարության ծրագրեր իրականացնել՝ նոր տարածաշրջանային հանգույց ստեղծելու նպատակով»:
Աղբյուրի խոսքով՝ Անկարայի ներկայացրած ծրագիրը տարածաշրջանային երկրները կապելու է Եվրոպային  ու Ասիային: «Մարմարայի» ծրագրի (Բոսֆորի նեղուցի հատակով երկաթուղային թունելի կառուցում, որն իրականացնում է Թուրքիան, երկարությունը լինելու է 15.5 կիլոմետր-Tert.am) և Բաքու-Թբիլիսի-Կարս երկաթուղու միջոցով Լոնդոնը հնարավոր կլինի կապել Պեկինին, տարածաշրջանում քաղաքական իրադրության բարելավումը Հայաստանին թույլ կտա միանալ ռազմավարական այս ծրագրին»,-նշել է նա:

Անանուն աղբյուրն ընդգծել է, որ ծրագրի մասին տեղյակ են նաև Հայաստանն ու Ադրբեջանը: «Ադրբեջանցիները գիտեն՝ մենք ինչ ենք ուզում: Մենք ասել ենք նրանց, որ սա մի ծրագիր է, որը կյանքի կկոչվի, եթե Հայաստանը բռնի խաղաղության ճանապարհը»-նշել է նա՝ հավելելով, որ  Երևանը ծրագրի առնչությամբ մինչև այժմ որևէ հետաքրքրություն չի ցուցաբերել և Մինսկի խմբի միջոցով պաշտոնական որևէ պատասխան չի տվել։

«Անցած շաբաթ Հայաստանում կայացած նախագահական ընտրություններում Սերժ Սարգսյանի հաղթանակից հետո Թուրքիան չի ակնկալում, որ ԼՂ հարցի վերաբերյալ Հայաստանի քաղաքականությունը մոտ ապագայում փոփոխության կենթարկվի: Մենք մինչև 2015 թ. նշանակալից փոփոխություն չենք ակնկալում: Հայաստանը և հայկական  սփյուռքը ներկայում ամբողջ աշխարհում, 1915թ.դեպքերի 100-ամյա տարելիցին  ընդառաջ,  ակտիվ քարոզարշավ են իրականացնում՝ 1915թ. սպանությունները Ցեղասպանություն ճանաչելու ուղղությամբ»,-եզրափակել է աղբյուրը:

http://tert.am/am/news/2013/02/23/turkey-armenia/