Քուրդ պատգամավորների պատվիրակությունը մեկնել է Օջալանի հետ հանդիպման

Թուրքիայի խորհրդարանի քրդական Խաղաղություն եւ ժողովրդավարություն կուսակցության պատգամավորներից կազմված պատվիրակությունը փետրվարի 23-ին ոստիկանությանը պատկանող հատուկ նավով մեկնել է Իմրալը կղզի, որտեղ իր պատիժն է կրում PKK-ի առաջնորդ Աբդուլլահ Օջալանը։ 

Թուրքական Hurriyet-ի փոխանցմամբ՝ PKK-ի առաջնորդին այցելության գնացած պատգամավորներ Փերվին Բուլդանը, Սըրրը Սուրեյա Օնդերը եւ Ալթան Թանն իրենց հետ փոքրիկ թղթե պայուսակներ են տարել, որոնց մեջ, ըստ պատգամավորների, գտվում են գրքեր, գրիչ եւ թզբեհ։

Սպասվում է, որ Օջալանին այցելած պատգամավորները ափ կվերադառնան 16։00-ին։

Նշենք, որ քրդական կուսակցության պատգամավորների այցն Օջալանին կապված է թուրքական իշխանությունների եւ Ազգային հետախուզության ծառայության կողմից քրդական հարցի կարգավորմանն ուղղված հերթական փորձի հետ։

Հիշեցնենք, որ քուրդ պատգամավորների առաջին այցելությունը Իմրալը կղզի եղել է այս տարվա հունվարի 4-ին։ Այդ ժամանակ Օջալանի հետ հանդիպման էին գնացել քրդական «Ժողովրդավարական հասարակության կոնգրես»-ի առաջնորդ Ահմեդ Թուրքը եւ քրդական Խաղաղություն եւ ժողովրդավարություն կուսակցության պատգամավոր Այլա Աքաթ Աթան։

http://news.am/arm/news/141696.html