Սերժ Սարգսյանին ուղղված շնորհավորանքն արվել է թուրքական դիվանագիտության ավանդույթներին համապատասխան. Թուրքիայի ԱԳՆ

Նախագահի պաշտոնում վերընտրվելու կապակցությամբ Սերժ Սարգսյանին հղված շնորհավորական ուղերձն արվել է թուրքական դիվանագիտության ավանդույթներին համապատասխան։ Այս մասին ասվում է Թուրքիայի արտգործնախարարության նամակում՝ ի պատասխան ադրբեջանական ԱՊԱ գործակալության թուրքական բյուրոյի հարցադիմումի։

Գերատեսչությունից նշել են, որ ինչպես նախկինում, այնպես էլ հիմա, այլ երկրներում ընտրությունների արդյունքները հայտարարելուց հետո ուղարկվում են շնորհավորական ուղերձներ։

Թուրքական ԱԳՆ-ի հայտարարության մեջ նշվում է նաև, որ Թուրքիան ճանաչել է Հայաստանի անկախությունը 1991 թ. դեկտեմբերի 16-ին։ «Քաղաքակրթության միջազգային նորմերի շրջանակներում փոխադարձ ձևով կարող են ուղարկվել շնորհավորական ուղերձներ»,- հայտնել են ԱԳՆ-ից։

Ավելի վաղ Թուրքիայի նախագահ Աբդուլլահ Գյուլը շնորհավորական ուղերձ էր հղել Հայաստանի գործող նախագահ Սերժ Սարգսյանին՝ նախագահի պաշտոնում վերընտրվելու կապակցությամբ: Այդ մասին տեղեկությունը տարածել էր Աբդուլլահ Գյուլի մամուլի ծառայությունը:

Ադրբեջանը Թուրքիայից բացատրություններ էր պահանջել այս հարցով։ Ադրբեջանի նախագահի աշխատակազմի արտաքին կապերի բաժնի պետ Նովրուզ Մամեդովը հայտարարել էր, թե Թուրքիան պետք է հստակություն մտցնի շնորհավորանքների հարցով։

http://tert.am/am/news/2013/02/22/turkey-azerbaijan-serj-sargsyan/