Թուրքիայում թուրք ինքնությունը բրոունյան շարժման մեջ է

Ուռճացված տվյալներով անգամ Թուրքիայի բնակչության միայն 54 տոկոսն է իրեն համարում թուրք:

Ինչպես տեղեկացնում են թուրքական լրատվամիջոցները, Ստամբուլի Kadir Has համալսարանի կողմից 2012 թ. դեկտեմբերի 25-ից մինչև հունվարի 6-ը 26 մարզերում անցկացրած ուսումնասիրությունները շոկային ազդեցություն են թողել հասարակական կարծիքի վրա:

Համալսարանական մասնագետների կողմից «Թուրքիայում սոցիալ-քաղաքական միտումները» ծրագրի շրջանականերում իրականացված հարցախույզի արդյունքում պարզվել է, որ 2012 թ. բնակչության միայն 54.8 տոկոսն է իրեն համարում թուրք:

Մինչդեռ 2011 թ. անցկացված ուսումնասիրությամբ այդ ցուցանիշը 66.7 տոկոս էր: Այսօր արդեն կարելի է վստահորեն ասել, որ 2014 թ. այդ ցուցանիշը կնվազի 50 տոկոսից, և Թուրքիայում իրենց թուրք համարող քաղաքացիները կդառնան փոքրամասնություն:

Բանն այն է, որ 2011 թվականի փետրվարին Եվրախորհրդի` Ընդդեմ ռասիզմի և անհանդուրժողականության հանձնաժողովը (ECRI) հրապարակել էր Թուրքիայի վերաբերյալ իր չորրորդ զեկույցը: Զեկույցում նշված էր, որ Թուրքիան բավարար առաջընթաց չի գրանցել ազգային և կրոնական փոքրամասնությունների իրավունքների պաշտպանության առումով:

Սակայն այս զեկույցն առանձնանում է նրանով, որ, թեև զգուշությամբ, սակայն առաջին անգամ փորձ է արվել տարբեր աղբյուրներից հավաքված տվյալների հիման վրա տալ Թուրքիայի ազգաբնակչության ազգային և կրոնական նկարագիրը` թվերով: Ընդ որում, հանձնաժողովն օգտագործել է նաև պետական մարմինների ներկայացրած տվյալները (ECRI Turkey):

Այդ տվյալների համաձայն` Թուրքիայում քուրդ ազգաբնակչությունը կազմում է 12-ից 15 մլն մարդ, ալեվիները` 4-ից մինչ 24 մլն մարդ , գնչուները 2.7 մլն մարդ, չերքեզները 3 մլն մարդ, լազերը` 1.5 մլն մարդ: Հայերի թվաքանակը, համաձայն հանձնաժողովի զեկույցի, կազմում է 93 000 մարդ:

Հստակ երևում է, ր ECRI-ն չի հաշվել զազա քրդերին կամ նրանց ընդգրկել է ալեվիների մեջ:

Ինչևէ, եթե վերցնենք առավելագույն թվերը, որոնք ավելի մոտ են ճշմարտությանը, իսկ լազերը առնվազն կրկնակի անգամ շատ են, ապա ստացվում է, որ Թուրքիայում իրենց թուրք համարողները փոքրամասնություն են:

Թուրքիայի բնակչությունը կազմում է 75 մլն մարդ, իսկ ECRI տվյալներով շուրջ 47 մլն մարդ ներկայացնում է կա’մ ազգային, կա’մ էլ կրոնական փոքրամասնություն:

http://www.armweeklynews.am/awn/m13/m_0111.htm