Ավստրալացի պատգամավոր Ջոն Ալեքսանդրը խորհրդարանում կրկին բարձրացրել է Հայոց ցեղասպանության հարցը

Ավստրիայի խորհրդարանում Հայոց ցեղասպանության ճանաչման ջատագով, Ավստրալիայի Բեննելոնգի դաշնային անդամ, Լիբերալ կուսակցության անդամ Ջոն Ալեքսանդրը հանդես է եկել հայկական համայնքի պահանջների մասին ելույթով: Ինչպես հաղորդում է «Արմենպրես»-ը` վկայակոչելով Ավստրալիայի հայ դատի հանձնախմբի կայքը, խորհրդարանում հնչեցրած իր հայտարարությունում Ալեքսանդրը կրկին անդրադարձել է Հայոց ցեղասպանության միջազգային ճանաչման հարցին: Նա նաեւ գովեստի խոսքեր է հղել ավստրալահայ հասարակական գործիչ Յասկես Բարանին, ով հայ համայնքին մատուցած երկարատև տարիների ծառայության համար «Ռայդ քաղաքի տարվա պատվավոր քաղաքացու» կոչմանն է արժանացել:
«20-րդ դարի դարասկզբին հայ ժողովրդի հանդեպ իրականացված ցեղասպանությունը ստիպեց հայերին ցրվել աշխարհով մեկ, ինչը մեծ խոչընդոտներ ստեղծեց հայկական յուրահատուկ մշակույթի պահպանման գործում: Յասկես Բարանի նման մարդիկ ապագա սերունդների ազգային ավանդույթներին հավատարիմ դաստիարակելու շնորհիվ կարողացան հաղթահարել այդ խոչընդոտները և պահպանել կապը իրենց պատմամշակութային ժառանգության հետ»,- ասել է նա:

2011 թ. Բարանը միացել է Հյուսիսային Ռայդ համայնքի օգնության եւ տեղեկատվական կենտրոնին, որպես կամավոր, աջակցություն և օգնություն ցուցաբերել հաշմանդամներին եւ կենտրոնի տարեց հաճախորդներին:

«Ադոլֆ Հիտլերը հրեական համայնքի դեմ իրականացրած իր հանցագործություններն արդարացնելու համար նշել է, որ ոչ ոք չի հիշում հայերի ցեղասպանությունը»: Այն, որ Հայոց ցեղասպանությունից մոտ 100 տարի անց, մենք կարող ենք կանգնել աշխարհի այս կողմում եւ ծափահարել Բարանի նման մարդկանց ջանքերը, վկայում է այն մասին, որ մենք հիշում ենք հայերին, գեղեցիկ հայ լեզուն ու մշակույթը: Այժմ, երբ մենք մեր ուշադրության կենտրոնում ենք պահում Հալեպի հայ քրիստոնյա փոքրամասնության խնդիրները, աղոթում ենք, որ ղեկավարությունը օգնի այդ հպարտ ժողովրդին` ոտքի կանգնել ևս մեկ անգամ»,- հայտարարել է Ալեքսանդրը:

Ավստրալիայի հայ դատի հանձնախմբի գործադիր տնօրեն Վաչե Ղահրամանյանը, բարձր գնահատելով դաշնային անդամ Ալեքսանդրի ելույթը, շնորհակալություն է հայտնել վերջինիս այս կարևոր խնդիրը կրկին բարձրացնելու համար:

«Տխուր իրականություն է, որ ցեղասպանության պատճառով հայերը ստիպված են եղել լքել իրենց նախնիների հայրենիքը: Պարոն Ալեքսանդրը մշտապես եղել է հայ-ավստրալական համայնքին հուզող խնդիրների ջերմեռանդ պաշտպանը, և մենք շնորհակալություն ենք հայտնում նրան աջակցության համար»,- ասել է Ղահրամանյանը:

Ավստալիայի հայ դատի հանձնախումբը նաև իր ջերմ բարեմաղթանքներն ու շնորհավորանքներն է հղել Յասկես Բարանին իր ձեռքբերումների կապակցությամբ:

http://armenpress.am/arm/news/709099/avstralaci-patgamavor-jon-aleqsandry-khorhrdaranum-krkin.html