Ցեղասպանությունը բոլոր քրիստոնյաների ողբերգությունն է. Ռիկարդո Միլիորի

ԵԱՀԿ խորհրդարանական վեհաժողովի նախագահ Ռիկարդո Միլիորին փետրվարի 19-ին այցելեց Ծիծեռնակաբերդի հուշահամալիր` հարգանքի տուրք մատուցելու Հայոց եղեռնի զոհերի հիշատակին: Միլիորին ծաղկեպսակ դրեց ցեղասպանության զոհերի հուշարձանին, լռությամբ հարգեց մեկ ու կես միլիոն անմեղ զոհերի հիշատակը։ Նա շրջեց Ցեղասպանության թանգարան-ինստիտուտում, ծանոթացավ Հայոց ցեղասպանությունը հավաստող վավերագրերին ու փաստաթղթերին, ապա գրառում կատարեց պատվո հյուրերի հուշամատյանում: Միլիորին ծառ տնկեց հիշողության պուրակում:
«Արմենպրես»-ի հետ զրույցում ԵԱՀԿ խորհրդարանական վեհաժողովի նախագահը նշեց, որ Հայոց ցեղասպանությունը բավական հուզիչ եւ տխուր պատմություն է իր համար: «Մենք այսօր այցելել ենք, որպեսզի ծանոթանանք եւ հասկանանք, թե իրականում ինչ է կատարվել 1915 թվականին: Շատ երկրներ ոչինչ չգիտեն Հայոց ցեղասպանության մասին, եւ ժամանակ է հարկավոր, որպեսզի բոլորը ճանաչեն ցեղասպանությունը: Դա ոչ միայն հայերի, այլեւ բոլոր քրիստոնյաների ողբերգությունն է: Եթե մենք գիտակցենք մեր անցյալը, կկարողանանք կիսել նաեւ մեր ապագան»,-ասաց ազգությամբ իտալացի Ռիկարդո Միլիորին:

http://zham.am/index.php?lid=am&pageName=lrahos&id=558101924