Թուրք լրագրողը դատարանում կրկնել է Հայոց ցեղասպանության իրողության եւ Դինքի սպանության մեջ թուրքական պետության մեղավորության պնդումները

Թուրք լրագրող Թեմել Դեմիրերը, ով Ստամբուլի «Ակօս» թերթի հայազգի խմբագրապետ Հրանտ Դինքի դեմ մահափորձի հաջորդ օրը հայտարարել էր, որ «Հրանտ Դինքը սպանվել է հայ լինելու եւ Հայոց ցեղասպանության իրողության մասին խոսելու համար», դատարանում շարունակել է պնդել նույն խոսքերը: «Ես հիմա էլ նույն «հանցագործությունն» եմ գործում. Դինքի մարդասպանը պետությունն է: Թող կրկին իմ դեմ հայց ներկայացնեն: Այսօր բոլորն էլ գիտեն Հայոց ցեղասպանության իրողության մասին», – ասել է նա:

Ինչպես հաղորդում է «Արմենպրես»–ը` վկայակոչելով թուրքական bianet.org անկախ լրատվական կայքը, Թեմել Դեմիրերը Թուրքիայում մեղադրվում է այդ երկրի քրեական օրենսգրքի` «թրքականությունը վիրավորելու» տխրահռչակ 301-րդ հոդվածով: Անկարայի 2-րդ առաջին ատյանի քրեական գործերի դատարանում, որտեղ տեղի է ունեցել լրագրողի նկատմամբ հերթական դատալսումը, նրա փաստաբան Լեւենթ Քանաթը դատարանից պահանջել է արդարացման վճիռ կայացնել լրագրողի նկատմամբ` հիմնավորելով, որ նրա հայտարարությունները խոսքի ազատության սահմաններում են: Դատարանը որոշել է հետաձգել լրագրողի նկատմամբ հետաքննությունը եւ դատական գործընթացը:

http://armenpress.am/arm/news/708950/turq-lragroxy-dataranum-krknel-e-hayoc-cexaspanutyan.html