ԱԺ փոխնախագահ Հերմինե Նաղդալյանը հանդիպել է Թուրքիայի շուրջ տասը լրատվամիջոցների թղթակիցների հետ: Ողջունելով թուրք լրագրողների այցը Հայաստանի խորհրդարան՝ Հերմինե Նաղդալյանը կարևորել է նմանատիպ նախաձեռնությունների նշանակությունը հայ և թուրք ժողովուրդների միջև շփումներ ապահովելու տեսանկյունից՝ վստահություն հայտնելով, որ ցանկացած՝ անգամ ամենաբարդ խնդիրների մասին կարելի է և պետք է խոսել:
Պատվիրակության կազմում Հայաստան ժամանած «Հրանտ Դինք» հիմնադրամի ներկայացուցիչ Բուրջու Բեջերմենը նշել է, որ հիմնադրամի կողմից կազմակերպվող ամենամյա լրագրողական փոխայցելություններն իսկապես մեծ հնարավորություն են հայ-թուրքական հարաբերություններում առաջընթաց ունենալու տեսանկյունից:
Ծավալված հարցուպատասխանի ժամանակ թուրք լրագրողներից մեկն իր զարմանքն է արտահայտել այն կապակցությամբ, որ Հայաստանում նախագահական ընտրություններին ընդամենը երկու օր է մնացել, իսկ փողոցներում այդքան հանգիստ է, խաղաղ. ոչ մի անկարգություն չի նկատել: ԱԺ փոխնախագահն ի պատասխան նշել է, որ դա այն մեծ աշխատանքի վկայությունն է, որ Հայաստանում կատարվել է ժողովրդավարության ճանապարհին: «Նախկինում մենք էլ, լինելով եվրոպական տարբեր երկրներում, զարմանում էինք, թե ինչքան խաղաղ է անցնում այդ կարևորագույն իրադարձությունը: Այսօր այդպես է նաև Հայաստանում»,- մեկնաբանել է Հ.Նաղդալյանը։
Անդրադառնալով հայ-թուրքական արձանագրությունների հարցին՝ ԱԺ փոխնախագահը նկատել է, որ Թուրքիայից քայլերի ոչ միայն Հայաստանն ու միջազգային հանրությունն են սպասում, այլև, իր խորին համոզմամբ, նաև հենց թուրք ժողովուրդը: Նա նաև տեղեկացրել է թուրք լրագրողներին, որ հայ-թուրքական արձանագրությունները շարունակում են մնալ Հայաստանի Ազգային ժողովի օրակարգում, չնայած որ բազմաթիվ անգամներ դրանք հանելու առաջարկ է հնչել: Հ. Նաղդալյանը շեշտել է՝ Թուրքիան Եվրոպայի միակ երկիրն է, որ փակ սահմաններ է պահում մեկ այլ երկրի հետ, և միաժամանակ հույս հայտնել, որ թուրք հասարակության նոր սերունդը խնդրին ի վերջո այլ կերպ կնայի:
«Թըդեյս Զաման»-ի թղթակից Մուստաֆա Էդիփ Յիլմազը նշել է, որ ինքն անձամբ մեծ վիշտ է ապրում 1915թ. դեպքերի կապակցությամբ՝ ավելացնելով, որ թուրք հասարակության մեջ իսկապես այսօր զարթոնք կա. նոր սերունդը սկսել է հարցեր տալ: Նա նաև հետաքրքրվել է, թե արդյոք Հայաստանում իշխանության քայլերը միանշանակ են ընդունվում հասարակության կողմից: Ի պատասխան` Հերմինե Նաղդալյանը նշել է, որ, իհարկե, կան այլ կարծիքներ ևս, բայց ՀՀ ղեկավարությունը կարողացել է անցնել վստահության այն ճանապարհը, որ իր որոշումներն ու քայլերն ընկալելի և ընդունելի լինեն սեփական ժողովրդի համար: ԱԺ փոխնախագահը նաև համոզմունք է հայտնել, որ երջանիկ է այն առաջնորդը, ով գործում է իր հասարակության անունից, անում է քայլեր, որոնք թելադրում են իր ժողովրդի միտքը:
http://mardik.am
Leave a Reply