Արդարացում կամ դատապարտում, բայց` ոչ «հետաձգում»

«Թանկագի’ն բարեկամներ,

«Հրանտ Դինքը սպանվեց ոչ միայն հայ լինելու, այլ նաև Ցեղասպանությունը ճանաչելու համար» ասելուս պատճառով իմ դեմ Թուրքիայի քրեական օրենսգրքի 301-րդ և 216/1 հոդվածներով հարուցված դատական գործի նոր նիստը կայանալու է 2013 թ. փետրվարի 19-ին (ժամը` 9:30) Անկարայի 2-րդ քրեական դատարանում…

Այդպիսով, Հրանտի սպանության հաջորդ օրը (2007 թ. հունվարի 20) Անկարայի Յուքսել պողոտայում ունեցած ելույթիս հետևանքով «Թուրքիայի Հանրապետության պետությանը հրապարակավ ստորացնելու» և «ատելություն ու թշնամություն հրահրելու» մեղադրանքներով հարուցված դատական հայցը լրացրեց իր վեցերորդ տարին:

2007 թ. դեկտեմբերի 24-ի ամսաթիվը կրող մեղադրական ակտի հեղինակ` հանրապետության դատախազ Լևենթ Սավաշը հանդես է եկել հետևյալ արտահայտությամբ` «…կասկածյալի հայտարարությունները մերժում են թուրքական թեզը», և «Հայոց ցեղասպանության» վերաբերյալ իմ հայտարարություններով թուրք պաշտոնական տեսակետը ժխտելուս համատեքստում ինձ մեղադրել 301-րդ հոդվածով: Այդպիսով մեկնարկել է իմ դատավարությունը` «Հայոց ցեղասպանություն է եղել» ասելուս պատճառով:

Դատական գործ հարուցելուն տեղիք տված ելույթումս ես ասել էի.

«Շատ կարճ եմ խոսելու: (…) Ապրում ենք մի երկրում, որտեղ ճշմարտությունների մասին աղաղակելը հավասարազոր է հանցագործության: Հրանտը սպանվեց ոչ միայն հայ լինելու, այլ նաև Ցեղասպանությունը ճանաչելու համար: Եթե Թուրքիայի մտավորականները 301 անգամ 301-րդի հանցագործությունը չգործեն, կնշանակի, որ մեղսակից են Հրանտի սպանությանը: Մեր պատմության ընթացքում ցեղասպանություն է իրագործվել: Այն կրում է Հայոց ցեղասպանություն անվանումը: Հրանտն իր կյանքի գնով այդ ճշմարտությունը բացատրեց բոլորիս: Ես հանցանք եմ կատարում և բոլորին հանցանք գործելու կոչ անում: Այս մարդասպան պետության հանդեպ հանցանք չգործածները, երեկ հայերին սպանածները այսօր հարձակվում են մեր քուրդ եղբայրների վրա: Ժողովուրդների եղբայրության ջատագովներս հարկադրված ենք առերեսվել այս պատմության հետ: Պետք է հանցանք կատարեն, որպեսզի երեկ մեր հայ եղբայրների գլխին եկածներն այսօր տեղի չունենան մեր քուրդ եղբայրների հետ: Կոչ եմ անում, որ բոլորդ հանցանք գործեք, 301 անգամ կատարեք 301-ի հանցագործությունը: Այո’, այս երկրում Հայոց ցեղասպանություն է եղել»:

Ես ներկայում էլ լիովին տեր եմ իմ ասածներին:

Այդ մասին 2013 թ. փետրվարի 5-ին մեկ անգամ ևս հայտարարեցի Անկարայի 2-րդ քրեական դատարանին ներկայացրածս «Արդարացում կամ դատապարտում, բայց` ոչ «հետաձգում»» վերնագրով փաստաթղթում:

Հիշյալ փաստաթղթում

ՀՐԱՆՏԻ ՄԱՐԴԱՍՊԱՆ(ՆԵՐ)Ը

ԻՐԱՎՈՒՆՔԻՆ ՀԱՐՄԱՐՎՈՂԱԿԱՆՈՒԹՅՈՒՆԻՑ ԲԱՂԿԱՑԱԾ ՉԷ ԱՐԴԱՐՈՒԹՅՈՒՆԸ

ԱՌԱՐԿԱՅԱԿԱՆՈՎ ԹՈՒՐՔ(ԻԱ)Ի ԻՐԱՎՈՒՆՔԸ (ԱՆԱՐԽԻԱՆ)

ՊԱՇՏՊԱՆՈՒԹՅՈՒՆԸ «ԴԱՏՈՂ» ԻՐԱՎՈՒՆՔԸ (ԱՆԱՐԽԻԱՆ)` ԺԱՄԱՆԱԿԱԿԻՑ ԻՐԱՎԱԲԱՆՆԵՐԻ ՄԻՈՒԹՅԱՆ ՕՐԻՆԱԿՈՎ

ՄՏՔԻ ԱԶԱՏՈՒԹՅՈՒՆԸ

ԹՈՒՐՔԻԱՅԻ ՔՐԵԱԿԱՆ ՕՐԵՆՍԳՐՔԻ ՀԱՅՏՆԻ ԵՒ ՏԽՐԱՀՌՉԱԿ 301-ՐԴ ՀՈԴՎԱԾԸ

ՀԱՅՈՑ ՑԵՂԱՍՊԱՆՈՒԹՅԱՆ ԽՆԴԻՐԸ. ՊԱՇՏՈՆԱԿԱՆ ԺԽՏՈՂԱԿԱՆ ՏԵՍԱԿԵՏԸ

ՊԵՏԱԿԱՆ ԳՈՐԾԵԼԱԿԵՐՊԸ=ԹՈՒՐՔԻԱՅԻ (ՀԱՆՐԱՊԵՏՈՒԹՅԱՆ) ԾԱԳՈՒՄԸ

ՑԵՂԱՍՊԱՆՈՒԹՅՈՒՆ` 1909-ԻՑ 1915-Ի ՄԻՆՉԵՒ ԱՊՐԻԼԻ 24

1909-ԻՑ ՄԻՆՉԵՒ ԱՊՐԻԼԻ 24

ԽՆԴԻՐ ԿԱՄ ԷԼ Ի՞ՆՉ Է ՑԵՂԱՍՊԱՆՈՒԹՅՈՒՆԸ

«Ո՞Չ» ԵՔ ԱՍՈՒՄ: ԱՀԱՎԱՍԻ’Կ ՁԵԶ ՎԿԱ(ՅՈՒԹՅՈՒՆ)ՆԵՐ

ՏԵՂԱՀԱՆՈՒԹՅՈՒՆԸ ԵՒ ԴՐԱՆԻՑ ՀԵՏՈ ՏԵՂԻ ՈՒՆԵՑԱԾԸ

ՈՒՐՖԱ-ԲՐԱԶԻԼԻԱ-ԲԵՅՐՈՒԹ-ՈՒՐՈՒԳՎԱՅ ՆՇՈՒՄՆԵՐԸ

ՎԿԱ(ՅՈՒԹՅՈՒՆ)ՆԵՐԻՆ ԷԼ Ե՞Ք «ՈՉ» ԱՍՈՒՄ: ԱՀԱՎԱՍԻ’Կ ՁԵԶ (ԲՌՆԱԶԱՎԹՄԱՆ) ՏՎՅԱԼՆԵՐ

ԵՒ ՍԱՄԱԹՅԱՆ

ՎԵՐՋԱՊԵՍ

ենթավերնագրերի ներքո դատական գործի նկատմամբ իմ դիրքորոշումը մեկ անգամ ևս արտահայտելիս հայտարարեցի, որ չեմ ցանկանում օգտվել այդ «կարգավորումից», քանի որ դեռ կատարվում էին Սամաթյայի դեպքերը, քանի որ Կենդանիների կյանքի իրավունքների պահպանման կազմակերպության ներկայացուցիչ Եվա Աքսոյին էլեկտրոնային հասցեի միջոցով այնպիսի խոսքերով վիրավորելու համար դատվող Մեհմեթ Ալի Օզչարըքչան, ինչպիսիք են` «Իմ երկիրը քեզ համար նեղ է, դու Երևան գնա’», «Քո վերջը կախաղանն է», «դաշնակցականի մնացուկ», ազատվեց 3-րդ դատական փաթեթի շնորհիվ:

Այս իրավիճակում դատական հայցերը և խոսքի ազատության թղթապանակները երեք տարի չթարմացնելու պայմանով հետաձգված 3-րդ դատական փաթեթը, քանի որ դատվող ընդդիմադիր մտքի տեր անձանց և լրագրողներին «երեքամյա ինքնագրաքննության» է մղել, ես կտրականապես չեմ ընդունում իմ դատավարության հետաձգումը:

Քանզի արդարադատության նախկին նախարար Մեհմեթ Ալի Շահինի` «ես թույլ չեմ տա իմ պետությանը մարդասպան անվանել» ասելով` հավանություն տված Թուրքիայի քրեական օրենսգրքի 301-րդ հոդվածով իմ դեմ հարուցված դատական գործի առնչությամբ իմ դատապաշտպան Լևենթ Քանաթը նշել է. «Երբ 301-րդ հոդվածով կասկածյալների հարցաքննության կամ դատական հայցի իրավասությունը, դատախազներից վերցվելով, տրվում է Արդարադատության նախարարությանը, կամ երբ այդ գործերը, 3-րդ դատական փաթեթի համաձայն, ենթարկվում են հետաձգման դրույթներին, մտքի ազատություն չի մնում»: Ես էլ մեկ անգամ ևս կրկնում եմ նրա վերոնշյալ խոսքը:

Կտրականապես դեմ եմ դատական գործի հետաձգմանը, կտրականապես դեմ եմ, որ սույն հայցը քննվի 3-րդ դատական փաթեթի շրջանակներում. անկախ արդյունքից` ուզում եմ, որ այս դատական գործն ավարտվի կա’մ իմ արդարացմամբ, կա’մ` իմ դատապարտմամբ:

Հարգանքներով`

Թեմել Դեմիրեր

Թարգմանեց Մելինե Անումյանը

Akunq.net