Դինքի գործով հայտնված նոր գաղտնի վկայի առաջ քաշած պայմանը կատարված է

Հրանտ Դինքի սպանության մասին նոր մանրամասներ հաղորդած գաղտնի վկան և նրա ընտանիքը պետական պաշտպանության տակ են վերցվել, տեղեկացնում է «Ռադիկալ»-ը։

Վկան նամակ էր գրել դատախազությանը, որում ներկայացվում է, որ դեպքից առաջ և հետո տարբեր զինվորների և բարձրաստիճան պաշտոնյաների հետ հեռախոսազրույցներ է ունեցել։

Այն խմբավորումը, որում ներգրավված է եղել նաև ինքը, խոստացել է սպանությունն իրականացնելուց հետո մի քանի տարվա ընթացքում բանտից ազատել իրեն և ուղարկել արտերկիր. խոստումը, սակայն, չի իրականացել։

Նա նշել էր, որ ինքը լավ է ճանաչել Էրհան Թունջելին (Հրանտ Դինքի սպանության գործով մեղադրյալներից, ում դատարանն արդարացրել էր- Tert.am) և սպանությունից առաջ «Ակօս» թերթի խմբագրության շենքի առջևի տարածքն են ուսումնասիրել։
«Սպանությունը Թունջելի հետ ենք պլանավորել, Թունջելը դրա մասին թե՛ ոստիկանությանը, թե՛ ժանդարմերիային տեղյակ էր պահել»,-պնդել էր վկան՝ նշելով, որ սպանության պատվերը, սակայն, առանց իր մասնակցության է իրականացվել։

Վկան դատախազությունից պահանջել էր ապահովել իր և իր ընտանիքի անվտանգությունը։

Նա նշել էր, որ եթե դա ապահովվի, ապա ինքը պատրաստ է անուններ հայտնել և իր ձեռքում եղած ապացույցները տրամադրել դատախազությանը։

http://tert.am/am/news/2013/02/14/dink/