«Ակօս» պարբերականն անվճար կտրամադրվի «Թուրքական ավիաուղիներ»-ի չվերթերի ուղեւորներին

Ստամբուլում լույս տեսնող հայկական «Ակօս» պարբերականն այսուհետ Աթաթուրքի անվան օդանավակայանում «Թուրքական ավիաուղիներ» ընկերության կողմից անվճար տրամադրվող թերթերի շարքում կլինի: Այս մասին հաղորդում է «Արմենպրես»-ը` վկայակոչելով «Ակօս» պարբերականը:

«Թուրքական ավիաուղիներ» ընկերության և «Ակօս»-ի միջև կնքված համաձայնագրով նախատեսվում է, որ ավիաուղիներին պատկանող ինքնաթիռներով արտասահման մեկնող ուղևորները հնարավորություն կունենան անվճար ստանալ հայկական պարբերականը: Հաղորդվում է, որ «Թուրքական ավիաուղիներ»-ի և «Ակօս»-ի միջև առկա համաձայնագիրը առաջիկա ամիսների ընթացքում կարող է ընդլայնվել` ներառելով ավելի մեծ թվով չվերթեր եւ ընդգրկելով նաև այլ ավիաուղիների:

 «Ակօս» շաբաթաթերթը լույս է տեսնում երկու լեզուներով` հայերեն և թուրքերեն: Այն 1996 թ. հիմնադրել է Հրանտ Դինքը:

http://armenpress.am/arm/news/708344/akos-parberakann-anvtchar-ktramadrvi-turqakan-aviauxiner-i.html