Թուրք պատգամավորը պահանջում է հայ կանանց դեմ հարձակումների ուսումնասիրման համար հանձնաժողով ստեղծել

Ստամբուլի Սամաթյա թաղամասում ապրող տարեց հայ կանանց դեմ հարձակումների հետ կապված հարցը հերթական անգամ բարձրացվել է Թուրքիայի ազգային մեծ ժողովում:

Թուրքական T24.com կայքի փոխանցմամբ՝ Թուրքիայի խորհրդարանի ընդդիմադիր Ժողովրդահանրապետական կուսակցության պատգամավոր Լեւենթ Գյոքը հայ կանանց դեմ հարձակումների հետ կապված դիմում-պահանջ է ներկայացրել խորհրդարանի մարդու իրավունքների հանձնաժողով՝ պահանջելով հատուկ հանձնաժողով ստեղծել այդ հարձակումների կազմակերիչներին գտնելու համար: Թուրք պատգամավորն իր դիմումի մեջ շեշտել է, որ մեծ է հավանականությունը, որ հարձակումներն իրականացվել են կրոնական ու ազգային ատելության հողի վրա:

Նշենք, որ ավելի վաղ, Ժողովրդահանրապետական կուսակցության 2 փոխնախագահներն առանձին-առանձին գրավոր հարցադրում էին ուղղել Թուրքիայի վարչապետին՝ պահանջելով պարզաբանել հայ կանանց դեմ տեղի ունեցած սիստեմատիկ հարձակումները:

Հիշեցնենք` դեկտեմբերից սկսված Ստամբուլի հայերով բնակեցված Սամաթյա թաղամասում 4 հարձակում է տեղի ունեցել տարեց հայ կանանց դեմ։ Բոլոր հարձակումներն ունեն նույն ձեռագիրը։ Հարձակումներից մեկի ժամանակ հանցագործը կամ հանցագործները դաժանորեն սպանել են Մարիցա Քյուչուքին։ Հարձակումներից երկուսում հանցագործի դաժան ծեծի հետեւանքով 2 տարեց հայ կանայք զրկվել են աչքերից մեկից։ Իսկ մի դեպքում էլ փորձ է արվել առեւանգել հայ կնոջը։

http://news.am/arm/news/140008.html