Քրդերը թուրքական իշխանություններից պահանջել են Օջալանի հետ տեսակամուրջ հաստատելու հնարավորություն տալ

«Քուրդիստանի աշխատավորական կուսակցության» (ՔԱԿ) իրաքյան, եվրոպական կառույցները եւ Թուրքիայի խորհրդարանում 35 պատգամավորներ ունեցող միակ քրդական Խաղաղություն եւ ժողովրդավարություն կուսակցության (ԽԺԿ) ղեկավարները թուրքական իշխանություններից պահանջել են Օջալանի հետ ուղղակի կապ հաստատելու հնարավորություն տալ: Որպես շփման միջոց առաջարկվում է հեռուստակամուրջ ստեղծել Օջալանի եւ Կանդիլի (իրաքյան Քուրդիստանում ՔԱԿ-ի կենտրոնակաայանը) միջեւ: Քննարկվելիք հարցերի շրջանակը պետք է ներառի ՔԱԿ-ի` հրադադար հայտարարելու, Թուրքիայի տարածքից հեռանալու եւ զենքը վայր դնելու մասին հարցեր, նաեւ առնչվի քրդական խնդրի լուծման շուրջ Թուրքիայի պաշտոնական շրջանակների` Իմրալիում ցմահ բանտարկության դատապարտված առաջնորդ Աբդուլլա Օջալանի հետ տարվող բանակցություններին:

Ինչպես հաղորդում է «Արմենպրես»–ը, այս մասին հայտնում է թուրքական T24 հեռուստաալիքը` նշելով, որ նման պահանջով 2013 թ-ի հունվարի 22-ին հանդես էր եկել ՔԱԿ-ի զինյալ թեւի առաջնորդ Մուրադ Քարայըլանը Fırat լրատվական գործակալությանը տված հարցազրույցում: «Եթե խոսքը մեր պայքարում ռազմավարական փոփոխության մասին է, ապա մենք պետք է հնարավորություն ունենանք ուղիղ կապի մեջ լինել մեր առաջնորդ Ափոյի հետ: Մենք գտնում ենք, որ Անկարայի հետ բանակցություններին պետք է մեզ ներկայացնի Օջալանը, բայց նաեւ ցանկանում ենք մեզ ուղղված հանձնարարակնները լսել անձամբ նրանից», -ասել էր նա:

Թուրքական Taraf թերթի հետ հունվարի 29-ին ունեցած զրույցում ՔԱԿ-ի Եվրոպայի պատասխանատու Զուբեյիր Այդարն ասել էր, որ Օջալանի հետ ուղղակի կապի առկայությունն այդ հարցում անհրաժեշտություն է: «Պարտիզաններին միայն Օջալանը կարող է համոզել: Դրա համար պետք է կազմակերպության պատվիրակությունը հանդիպի Օջալանի հետ երես առ երես», -ասել էր նա:

Նույնպիսի պահանջով Եվրոպայի խորհրդարանում փետրվարի 8-ին հանդես էր եկել նաեւ ԽԺԿ-ի առաջնորդ Սալահեդին Դեմիրթաշը: «Անհրաժեշտ է պայմաններ ապահովել Օջալանի եւ իր կազմակերպության միջեւ ուղղակի խորհրդատվություններ անցկացնելու համար: Դա կարելի է անել ժամանակակից տեխնոլոգիաների հնարավորությունների օգտագործմամբ», -ասել էր Դեմիրթաշը` նշելով, որ այդ կերպ Օջալանը հնարավորություն կունենա անձամբ բացատրել կազմակերպությանը հրադադարի, նահանջելու եւ զենքը վայր դնելու ճանապարհային քարտեզը:

Այդ մասին «Թարաֆ»-ի տված հարցին Իմրալիում ընթացող բանակցությունների համար լիազորված Թուրքիայի ազգային անվտանգության աղբյուրները հերքել են Իմրալիի եւ Կանդիլի միջեւ հեռուստակամուրջներ ստեղծվելու մասին շրջանառվող լուրերը` նշելով, որ դա թույլ չի տալիս առկա օրենսդրությունը: Սակայն, թերթին հասած տեղեկություններով, Անկարան, հասկանալով նման կապի կարեւորությունն ու անհրաժեշտությունը խնդրի կարգավորման հարցում, արդեն համաձայնվել է նման հեռուստակամուրջների անցկացմանը:

http://armenpress.am/arm/news/708106/qrdery-turqakan-ishkhanutyunneric-pahanjel-en-ojalani.html