Թուրք սպաները մեծ խմբերով հրաժարական են տալիս, որպեսզի խուսափեն ձերբակալություններից և իշխանությունների դեմ դավադրության մեղադրանքով ազատազրկումից, հայտնում է Russia Today-ը:
Երկրի վարչապետ Էրդողանը շահում է տասնամյակ տևած պատերազմը երկրի՝ ժամանակին ամենակարող գեներալների հետ:
Վերջին քառորդ դարում թուրքական զինված ուժերը հռչակվել են նրանով, որ կանոնավոր ձևով միջամտել են ներքին քաղաքականությանը, մի քանի հեղաշրջումներ են կազմակերպել և առհասարակ մեծ ազդեցություն են ունեցել քաղաքականության ասպարեզում: Թուրք բարձրաստիճան զինվորականները միշտ հպարտացել են նրանով, որ իրենք են պահպանում թուրքական պետության աշխարհիկ բնույթը, որը Թուրքիայի Հանրապետության պաշտամունքային առաջնորդ Աթաթուրքի ժառանգությունն է:
Սակայն 2002 թ. ի վեր, երբ իշխանության եկան Էրդողանն ու իր Արդարություն և զարգացում կուսակցությունը, նրանք իրենց խոցելի զգացին քաղաքական դիրքերում ավանդաբար ուժեղ զինված ուժերի առաջ:
Զինուժը իր հերթին Էրդողանի կուսակցությանը համարում էր սպառնալիք Թուրքիայի աշխարհիկությանը, իսկ կուսակցությունը՝ զինուժին՝ բռնապետ, որը չափազանց երկար է այդ երկրին ասել, թե ինչ անի:
Զինվորականների առաջին ամենահնչեղ դատավարությունը տեղի ունեցավ 2011 թ. հուլիսին. տասնյակ զինվորականների մեղադրում էին հեղաշրջում նախապատրաստելու համար:
2012 թ. սեպտեմբերին՝ 21 ամիս տևած դատավարությունից հետո, թուրքական դատարանը 20 տարվա ազատազրկման դատապարտեց 3 թուրք գեներալի: Ըստ դատարանի՝ դրանից մեկ տասնամյակ առաջ գեներալները պատերազմ էին ծրագրել հարևան Հունաստանի հետ և պատրաստվում էին պայթեցումներ անել թուրքական մզկիթներում:
Տեղի չունեցած այդ հեղաշրջման համար նաև 330 սպա ազատազրկվեց, այդ թվում՝ բարձրաստիճան:
Այժմ հարյուրավոր թուրք զինվորականներ դեռ դատական գործընթացներում են՝ պետության դեմ մի շարք դավադրությունների մեղադրանքով:
Ըստ աղբյուրի, ընդհանուր առմամբ, բարձրաստիճան զինվորականների՝ գնդապետների ու գեներալների 15 տոկոսը Թուրքիայում դատական գործընթացների մեջ են: Այժմ ճաղերի հետևում է թուրք գեներալների ու ծովակալների 10 տոկոսը՝ 348 մարդ:
2013 թ. հունվարից թուրք զինվորականների զանգվածային «ելքին» նոր ազդակ տրվեց: Դա սկսեց թուրքական ծովուժի 2-րդ ամենակարևոր դեմքի՝ ծովակալ Նուսրթե Գյուների հրաժարականով:
Օդուժում եղան 110 հրաժարականներ:
Այս ամենի նկատառումով՝ RT-ն մեջբերում է անում իր հարցազրույցից Սիրիայի նախագահ Բաշար Ասադի հետ, որի՝ իր երբեմնի բարեկամի դեմ այսօր հանդես է գալիս Էրդողանը: Էրդողանը կարծում է` «ինքը խալիֆ է ու նոր սուլթան Օսմանյան կայսրությունում»: Ասադն ասել է, որ Էրդողանի քաղաքականությունը հանգեցնում է «զրո բարեկամների»՝ ակնարկելով նրա «զրո թշնամի հարևան երկրներում» անվանումով հռչակված հայտնի քաղաքական գիծը:
http://tert.am/am/news/2013/02/09/erdogan-vs-army/
Leave a Reply