Դիարբեքիրում իրավիճակը լարված է. քուրդ ցուցարարներից մեկը զոհվել է

Նախօրեին Դիարբեքիր քաղաքում բողոքի ցույցեր են եղել` կապված թուրքական իշխանությունների կողմից «Քրդստանի աշխատավորական կուսակցության» (PKK) առաջնորդ Աբդուլլահ Օջալանի և նրա փաստաբանների տեսակցությունը խոչընդոտելու հետ:

Բողոքի ակցիայի ժամանակ սովորականի պես բախումներ են տեղի ունեցել քրդերի և թուրքական ոստիկանական ուժերի միջև:

Թուրքական կողմը քուրդ ցուցարարների դեմ ջրցան մեքենաներ և արցունքաբեր գազ է օգտագործել, իսկ քրդերն էլ իրենց հերթին քարեր, մոլոտովյան կոկտելներ և ձայնային ռումբեր են նետել ցույցը ցրել փորձողների վրա:

Ցույցի ժամանակ, բացի վիրավորներից, նաև մարդ է զոհվել: Անչափահաս քուրդը զոհվել է, երբ փորձել է ինքնաշեն ռումբը նետել թուրք ոստիկանների վրա. այն պայթել է պատանու ձեռքում:

Նշենք, որ փետրվարի 15-ին Թուրքիայի մի շարք քաղաքներում ու բնակավայրերում, որտեղ հոծ քրդական բնակչություն կա, զանգվածային ցույցեր և անկարգություններ են սպասվում: Փետրվարի 15-ին ձերբակալվել է քուրդ առաջնորդ Օջալանը, և տարվա այդ օրը Թուրքիայում մշտապես միջադեպեր են գրանցվում:

Հիշեցնենք, որ Աբդուլլահ Օջալանը (ծնվ.՝ 1949 թ., Ուրֆայում), ով քրդերի շրջանում հայտնի է նաև Ափո անունով, Քրդստանի աշխատավորական կուսակցության (PKK) հիմնադիրն է և առաջնորդը: Մարքսիստական գաղափարների կողմնակից է:

Քրդստանի անկախության, ավելի ուշ քուրդ ժողովրդի իրավունքների ընդլայնման համար Թուրքիայի դեմ 30-ամյա պայքար մղող Օջալանը 1999 թ. փետրվարի 15-ին ձերբակալվել է և թուրքական դատարանի կողմից դատապարտվել մահապատժի՝ «հայրենիքի դավաճանության» մեղադրանքով, որն ավելի ուշ փոխարինվել է ցմահ ազատազրկմամբ: Վերջինս իր պատիժը կրում է թուրքական Իմրալը կղզում գտնվող բանտում: Օջալանը, ում ազգանունը թարգմանաբար նշանակում է «վրիժառու», 40 անուն գրքերի հեղինակ է: Թուրքիայում 80-90-ական թթ.-ին տեղեկություններ էին շրջանառվում, որ Օջալանն ազգությամբ հայ է, սակայն դրանք որևէ հաստատում չգտան:

http://haynews.am/hy/1360564906