Սիրիայից Աբխազիա վերաբնակեցումը կարելի է, Թուրքիայից ՝ ոչ

Ռուսաստանը հատուկ ուշադրության կենտրոնում է պահում Աբխազիայի վերաբնակեցման քաղաքականությունը:

2011 թ. Աբխազիայի նախկին նախագահ Բաղապշի` Թուրքիա կատարած երկօրյա այցի ընթացքում տեղի աբխազական համայնքի հետ կայացավ համաձայնություն, որ շարունակվելու է Թուրքիայի աբխազների վերաբնակեցման քաղաքականությունը, ինչը Ռուսաստանի անմիջական ճնշմամբ դադարեցվել էր 1997 թվականից:

Մինչ այդ, փորձնական կարգով, Աբխազիա էին վերաբնակեցվել շուրջ 300 ընտանիքներ, որոնց մեծ մասը հետագայում ետ վերադարձավ Թուրքիա:

Թուրքիայից ժամանած ընտանիքները փորձում էին նաև իսլամ տարածել Աբխազիայում, սակայն 2008-2010 թթ. երեք իմամների սպանությունից հետո, իսլամի տարածումն էլ կանխարգելվեց:

Աբխազիայի նախկին նախագահ Բաղապշից թուրքական իշխանությունները և աբխազական հայրենակացական միությունները պահանջել էին այդ երկրում բնակվող 700 հազար անդամ ունեցող համայնքից առնվազն 50 հազարի համար հայրենադարձության ծրագիր մշակել: Բաղապշը տվել էր իր համաձայնությունը:

Թուրքիայից վերադառնալուց հետո Աբխազիայի նախագահին կանչեցին Մոսկվա` բացատրություն տալու նպատակով: Մոսկվայում Բաղապշը մահացավ սրտի տագնապից:

Աբխազիայի ներկայիս նախագահ Անկվաբը շատ զգուշորեն է մոտենում վերաբնակեցման հարցին: Թուրքիայից աբխազների վերաբնակեցման մասին խոսք լինել չի կարող, սակայն Սիրիայից աբխազների վերաբնակեցման հարց քննարկվում է:

Աբխազիայի արտագործնախարությունն անցյալ շաբաթ պաշտոնապես հայտարարել է, որ Սիրիայում բնակվող աբխազ ընտանիքներից ստացել է 126 դիմում, և այժմ աշխատանքներ են տարվում այդ ուղղությամբ: Աբխազիայի արտգործնախարար Վյաչեսլավ Չիրիբկան իր հերթին տեղեկացրել է, որ Սիրիայից Աբխազիա վերաբնակիչների համար անհրաժեշտ է ստանալ Ռուսաստանի տարածքով տարանցիկ վիզաներ, քանի որ առանց դրանց հնարավոր չէ ընտանիքների ժամանումը: Թե ում համար Ռուսաստանը կտա թույլտվություն Աբխազիայում բնակվելու համար, արդեն Ռուսաստանի որոշելիքն է:

Մեր տեղեկություններով Աբխազիայի արտգործանախարարության Թուրքիայի և Մերձավոր Արևելքի բաժինը 2011-2012 թթ. Թուրքիայից Աբխազիա վերաբնակվելու համար ոչ մի դիմում չի ստացել և չի քննարկել:

http://www.armweeklynews.am/awn/m13/m_0087.htm