Ինչպես երեկ տեղեկացրել էր «Սոնսանիյե» կայքէջը, «գորշ գայլերի» քաղաքական կազմակերպության` Ազգայնական շարժում կուսակցության Յալովայի քաղաքային վարչությունը «Լեռնային Ղարաբաղի օկուպացիան դատապարտելու, վարչապետ Էրդողանի կառավարությանը վճռական քայլերի մղելու» առաջադրանքով ստորագրահավաք է նախաձեռնել:
Ահա թե ինչ է գրված ստորագրահավաքի ներկայացված տեքստում. «Ավելի քան 21 տարի օկուպացված է բուն թուրքական տարածք հանդիսացող եւ Ադրբեջանի մակերեւույթի 20 տոկոսը կազմող Լեռնային Ղարաբաղը: Քաղաքակիրթ աշխարհը քար լռությամբ շարունակում է անտեսել այս օկուպացիան: Ծպտուն չեն հանում նաեւ ՄԱԿ-ը, Եվրոմիությունն ու մահմեդական երկրները: ԵԱՀԿ-ն հեռու է հարցի կարգավորումից: Ինչո՞ւ են լռում արաբները, պարսիկները եւ մյուս մահմեդականները: Ինչո՞ւ Լեռնային Ղարաբաղում վարչապետ Էրդողանը հրաժարվում է ցուցաբերել այն հակազդեցությունը, ինչ ցուցաբերել է Պաղեստինի հարցում: Մենք` Ազգայնական շարժում կուսակցության Յալովայի վարչության անդամներս, անտարբեր չմնալու համար այս բռնությանը, ստորագրահավաք ենք նախաձեռնել: Ադրբեջանի թուրքերի հետ նույն արյուն կրողներն ենք, ունենք միեւնույն հոգին ու ոգին: Նրանց վիշտը մեր վիշտն է: Հավաքված ստորագրությունները ներկայացվելու են ՄԱԿ-ին ու Սպիտակ տանը»:
Հիրավի, թուրքերն ու ադրբեջանցիները միեւնույն հոգին ու ոգին ունեն: Մեկը հիանում եւ փառաբանում է մարդասպան Օգյուն Սամասթին, մյուսը` Ռամիլ Սաֆարով կոչված տականքին, կարծես ցույց տալու համար, որ նույնիսկ 21-րդ դարում չեն թոթափել հայատյացության անասնական բնազդը: Դա միանգամայն տրամաբանական է, որովհետեւ ոչ մի կերպ չեն կարողանում մարդ դառնալ:
Leave a Reply