Թուրք ազգայնականները հայերի դեմ հարձակումներով հասել են իրենց ուզածին. թուրքագետ

Ստամբուլի հայերով բնակեցված Սամաթյա թաղամասում տարեց հայ կանանց դեմ հարձակումներով թուրք ազգայնական որոշակի խմբավորումները հասել են իրենց ուզածին՝ ստամբուլահայերի մոտ ստեղծելով վախի եւ անհանգստության մթնոլորտ։ Այս մասին փետրվարի 4-ին լրագրողների հետ հանդիպման ժամանակ նշեց թուրքագետ Անդրանիկ Իսպիրյանը։

Թուրքագետի խոսքով՝  տեղի ունեցած հարձակումների ուսումնասիրությունն ու մեթոդները կասկած չեն հարուցում, որ այն ուղղված է եղել կոնկրետ հայերի դեմ։ «Դատելով հարձակումների կազմակերպման բնույթից` պարզ է դառնում, որ հարձակումները կազմակերպած թուրքական ազգայնական խմբավորումների նպատակն է եղել ստամբուլահայ համայնքի ներսում կրկին վախի եւ անհանգստության մթնոլորտ ստեղծել։

Ցավոք, հարձակումները կազմակերպած խմբավորումը հասել է իր ուզածին՝ վախի եւ անհանգստության մթնոլորտ ստեղծելով ստամբուլահայության մեջ։ Դրա վկայությունն է նաեւ այն, որ ստամբուլայերի շահերը ներկայացնող կառույցները խուսափում են գնահատական տալ հարձակումներին, իսկ ստամբուլահայերը լրատվամիջոցների հետ հարցազրույցներում չեն թաքցնում, որ խիստ մտահոգ են ստեղծված իրավիճակով եւ վախենում են միայնակ տնից դուրս գալ։ Բացի այդ, հայերի դեմ հարձակումների դեմ բողոքի գործողություններ իրականացրեցին թուրքական հասարակական կազմակերպությունները»,-նշեց թուրքագետը՝ շեշտելով, որ շատ հավանական է, որ Սամաթյայում տարեց հայ կանանց դեմ հարձակումները դադարեն։

http://news.am/arm/news/138695.html