Հայ կանայք միայնակ չեն. թուրք ֆեմինիստներն ընդդեմ Սամաթյայում հայ կանանց դեմ բռնարարքների

Ստամբուլի Ֆեմինիստական միության անդամ կանայք քայլերթ են կազմակերպել՝ ի նշան Սամաթյա թաղամասում հայ կանանց դեմ իրականացված հարձակումների, տեղեկացնում է Sondakika լրատվական կայքը։

Նրանք քայլերթով հասել են սպանված տարեց հայուհի Մարիցա Քյուչուքի տան մոտ և ծաղիկներ թողել այնտեղ։

Ֆաթիհ Քոջամուսթաֆափաշա հրապարակում հավաքված մոտ 200 կանայք պաստառ են պարզել «Հայ կանայք միայնակ չեն» վերտառությամբ, և հայերենով ու թուրքերենով մամուլի ասուլիս տվել։

«Վերջին օրերին հայերի դեմ ուղղված ռասիստական բնույթի բռնություններն ավելացել են, և դա է իրողությունը. տաքսի նստած կինը միայն հայ լինելու պատճառով բռնության ու ծեծի է ենթարկվում, ցույցին, որին ՆԳ նախարարն է մասնակցում, հակահայկական պաստառներ են պարզում, ավելացել են հայերի հանդեպ բռնության դեպքերը և ազգայնականության դրսևորումները։ Մենք ձեզ ամեն անգամ հիշեցնելու ենք, որ որպես կին` դեմ ենք բռնությանը և հետևում ենք իրադրությանը։ Պահանջում ենք, որ մեղավորներին գտնեք և պատասխան պահանջեք»,-հավաքվածների անունից հայտարարել է Դիրեն Շենը։

http://tert.am/am/news/2013/02/04/turk-feminists/