Ցեղասպանութիւնը վերապրած Հռիփսիմէ Հաճի Սարգսեանն ամէն օր աղօթում է աշխարհի խաղաղութեան համար

Հռիփսիմէ Հաճի Սարգսեանը 1915  թուականի Հայոց  ցեղասպանութեան ականատեսներից է, ով այս տարի բոլորեց իր 101-ամեակը: Նա այն եզակիներից է, ում  յաջողուել է ընտանիքի մի քանի անդամների հետ ողջ մնալ` գաղթելով  Յունաստան Արեւմտեան Հայաստանի Տաւշալու գիւղից: «Արմենփրես»-ի թղթակցի հետ զրոյցում  Աստղիկ Վարդանեանը` նրա հարսը,  տեղեկացրեց, որ վերջին օրերին Հռիփսիմէ Հաճիի առողջական վիճակը  կտրուկ անկում է ապրել, այդ պատճառով նա վերապատմեց այն,  ինչ յաճախ, առանց արցունքները թաքցնելու, սկեսրոջը  պատմել չի յաջողւում:

«Անմիջականօրէն ջարդի տարիներից Հռիփսիմէն ոչինչ չի յիշում, Ցեղասպանութեան մասին նրա յիշողութիւնները մշուշոտ են, եղբօր պատմածից գիտի, որ իր տատին ու պապին թուրքերը սպաննել են հէնց տան դիմաց», ասաց Աստղիկը` մէջբերելով սկեսրոջ պատմածը:  Հռիփսիմէի մայրը, անցնելով աքսորի ճանապարհը, հասնում է Պուլկարիա, այնուհետեւ` Յունաստան, որտեղ ծնողների մահից յետոյ Հռիփսիմէի խնամքով է զբաղւում աւագ եղբայրը:

Յունաստանում հանդիպելով իր երկրորդ կէսին` ապագայ ամուսնուն` Վաղարշակին, պատմութեան հերոսուհին սիրահարւում է առաջին հայեացքից եւ ամուսնանում:  Հայաստան նա վերադառնում է 1940-ականներին` իր հետ հայրենիք բերելով նաեւ Արեւմտեան Հայաստանից մնացած միակ յուշը` Քեոթայա (Քութահիա, Կուտինա-Ակունքի խմբ.) գիւղի Սուրբ Ստեփանոս եկեղեցու մասունքը, որի առաջ ամէն օր աղօթում է:

«Երեկոյեան պարտադիր աղօթքի ընթացքում Հռիփսիմէն խնդրում է Սուրբ Ստեփանոսից բոլոր մարդկանց համար առողջութիւն, իսկ աշխարհին` խաղաղութիւն»,-նշեց Աստղիկը` վստահեցնելով, որ Հռիփսիմէ Հաճիի հաւատքն առանձնակի է այդ սուրբ մասունքի աւանդութեան համաձայն ունեցած հրաշագործ ուժի հանդէպ:

Հռիփսիմէ Հաճի Սարգսեանն ունի  2  երեխայ, 6  թոռ, 14 ծոռ եւ 3  կոռ, որոնց շրջապատում էլ վայելում է իր ծերութիւնը` երբեք չմոռանալով Ցեղասպանութեան եւ նրա անդառնալի  հետեւանքների  մասին:

http://www.aztagdaily.com/archives/105084