Քուրդ զինյալները խոստացել են մինչև գարուն հեռանալ Թուրքիայից

Քրդստանի աշխատավորական կուսակցության (ՔԱԿ) ներկայացուցիչները մինչև մարտի 21-ը՝ քրդական Նոր տարվա օրը, կլքեն Թուրքիան, հայտնում է Russia Today-ը:

Առաջիկա 10 օրերի ընթացքում քրդերի բանտարկված առաջնորդ Աբդուլա Օջալանը պետք է պաշտոնապես դիմի քուրդ զինյալներին՝ զենքը ցած դնելու, զինված պայքարը դադարեցնելու և Թուրքիան լքելու կոչով:

Թուրք-քրդական հակամարտության խաղաղ կարգավորմանն ուղղված փոխվստահության ամրապնդման միջոցառումների շրջանակներում քրդերը դուրս կբերվեն Հյուսիսային Իրաք. այս կերպ կավարտվի բանակցությունների առաջին փուլը:

Հայտնի է, որ զինյալները երկիրը կլքեն առանց զենքի, իսկ Թուրքիայի իշխանությունները երաշխավորում են նրանց հանդեպ պատիժ չկիրառել: Մոտ 100 ծայրահեղական քրդերի հեռացմանը կհետևեն մի շարք հասարակական կազմակերպությունների դիտորդներ:

Թուրք-քրդական 30 տարվա հակամարտության ընթացքում ՔԱԿ-ը 5 անգամ միակողմանի հայտարարել է հաշտությունների մասին, վերջինը՝ 2006-ին՝ պասիվ ինքնապաշտպանության պայմաններով:

http://tert.am/am/news/2013/01/31/kurds-leaving/