Անկարայից Երևան քայլերթ սկսած ադրբեջանցին նեղացել է Ադրբեջանի հյուպատոսից ու հետ գնացել

Ի նշան Հայաստանի դեմ ունեցած բողոքի, Անկարայից-Երևան քայլերթ սկսած ադրբեջանցին վերադարձել է Անկարա՝ վիրավորված ադրբեջանցի հյուպատոսների վերաբերմունքից, տեղեկացնում է Haberler կայքը։

2 երեխա և 3 թոռ ունեցող 59-ամյա Քալենդեր Բայրամլըն քայլում է՝ ուսին 20 կգ կշռող բեռ, սակայն թուրքական տարբեր քաղաքներում գտնվող ադրբեջանական հյուպատոսարանները նրան լավ չեն ընդունում։

Բայրամլըն հասել է մինչև Կարս, որտեղ ցանկացել է հանդիպել հյուպատոս Այհան Սուլեյմանովի հետ։ Վերջինս, սակայն, չի ընդունել նրան, ինչից հետո Բայրամլըն զայրացել է, դադարեցրել քայլարշավն ու վերադարձել Անկարա։

Ի դեպ, ավելի վաղ նա ցանկացել էր հանդիպել նաև Թուրքիայում Ադրբեջանի դեսպանի հետ, սակայն նրա կողմից ևս ընդունելություն չէր կազմակերպվել։
«Չգիտես ինչու, փոխանակ հայերն անհանգստանան իմ քայլերթից, ադրբեջանցի դիվանագետներն են իրենց վատ զգում։ Երբ Կարսի հյուպատոսը չցանկացավ ինձ ընդունել, ես շատ զայրացա և տխրեցի։ Վերադարձա Անկարա և ամսի 28-ին ասուլիս եմ տալու»,- ասել է ադրբեջանցին։

http://tert.am/am/news/2012/12/27/azer-bayramli/