Թուրքիայում Աթաթուրքին «նետել» են աղբարկղը

Թուրքիայի Մուղլա նահանգի Դալաման քաղաքում` դեպի օդանավակայան գնացող ճանապարհի աղբարկղի մեջ, հայտնաբերվել են Թուրքիայի Հանրապետության հիմնադիր Աթաթուրքի դիմանկարը, անկախության հիմնի եւ երիտասարդությանը հղած նրա խոսքի տեքստերը պատկերող նկարները: Ինչպես հաղորդում է «Արմենպրես»–ը` վկայակոչելով CNNTurk-ը, պարզվել է, որ դրանք աղբարկղն են նետել նրանից 20 մետր հեռավորության վրա գտնվող վարժարանի հավաքարարները:

Դալամանի կրթության բաժանմունքի ղեկավար Մեթին Էնգինը կատարվածի առնչությամբ վարչական հետաքննություն է անցկացրել: Նրա խոսքով` այդ նկարներն այնքան են հնացել, որ այլեւս օգտագործման համար պիտանի չեն եւ ենթակա են ոչնչացման: «Սակայն, դրանք չպետք է ոչնչացվեին աղբարկղը նետելու միջոցով: Վարժարանի ղեկավարությունն այդ առնչությամբ կստանա անհրաժեշտ պատիժը»,- հավաստիացրել է նա:

Նշվում է, որ Աթաթուրքին աղբարկղը «նետելու» համար Դալամայի դատախազությունը դատական գործ է հարուցել վարժարանի ղեկավարության դեմ:

Թուրքական ԶԼՄ-ներում հաճախակիացել են Աթաթուրքի կիսանդրիները շրջելու, դրանց վրա ներկ լցնելու, ավերելու, լուսանկարներն այրելու դեպքերը:

http://armenpress.am/arm/news/703911/turqiayum-ataturqin-netel-en-axbarkxy.html