Թուրքական ոստիկանությունն արգելել է Մարաշի կոտորածին նվիրված հիշատակի արարողությունը

Թուրքական անվտանգության ուժերն ալևիական կազմակերպություններին արգելել են Մարաշի կոտորածին նվիրված հիշատակի արարողություն անցկացնել, հաղորդում է թուրքական Milliyet-ը:

Ոստիկանությունն ու զորքերն արգելել են Եվրոպայից և Թուրքիայի տարբեր վայրերից ժամանած` զոհվածների հարազատներին մուտք գործել քաղաք: Ըստ Ozgur Gundem կայքի` ոստիկանությունը նույնիսկ արցունքաբեր գազ է կիրառել, որի հետևանքով մի քանիսը վնասվածքներով տեղափոխվել են հիվանդանոց:

1978թ. դեկտեմբերի 19-24-ը Մարաշում թուրքական տարբեր խմբավորումներ` ազգայնամոլական Գորշ գայլեր կազմակերպության գլխավորությամբ, ավելի քան 100 ալևիների սպանեցին: Թուրքական պետությունը բորբոքել էր սուննի թուրքերի կրոնական զգացմունքները և հրահրել շիա ուղղության աղանդ համարվող ալևիների դեմ: Միջադեպի հետևում կանգնած էր թուրքական պետությունը, այդ պատճառով էլ այդ իրադարձությունները մնում են չբացահայտված:

Նշենք, որ օրերս քրդական Խաղաղություն և ժողովրդավարություն կուսակցությունը Թուրքիայի Ազգային մեծ ժողովին առաջարկել էր հանձնաժողով ստեղծել և ուսումնասիրել 1978թ. Մարաշում տեղի ունեցած կոտորածը:

http://civilnet.am