Թուրքիայում հայազգի զինծառայող Սևակ Շահին Բալըքչըի գործով վկաներն ուղղորդված ցուցմունք են տվել

Թուրքիայի Բաթման նահանգի Քոզլուք շրջանում զինծառայության ընթացքում սպանված Սևակ Շահին Բալըքչի սպանության գործով դատավարության ընթացքում նոր, կարևոր զարգացում է գրանցվել, տեղեկացնում է «Ակօս»-ը։

Վերջին վկայի ցուցմունքների համաձայն՝ այն ոստիկանական բաժանմունքում, որտեղ ծառայել է Սևակը, սպանությունից հետո ականատեսների վրա ճնշում է գործադրվել՝ իրականությունը թաքցնելու նպատակով։

Սևակ Շահին Բալըքչըն սպանվել է 2011թ. ապրիլի 24-ին, զինծառայող Քըվանչ Աղաօղլուի զենքից արձակված գնդակից։

Նրանց հետ նույն զորամասում ծառայած Հաքան Թեքքանաթը պատմել է, որ ենթասպա Սադրեթթին Էրսոզը սպանության ականատեսներին երեք անգամ հավաքել է և պահանջել Աղաօղլուի օգտին վկայություն տալ։

Վկան պատմել է, որ այդ հավաքների ընթացքում ենթասպան ասել է, որ «գնացողն արդեն գնացել է», և իրենց համոզել է Աղաօղլուի օգտին վկայություն տալ։

Սևակի սպանությունից հետո բոլոր զինծառայողներն իրենց վկայություններում նշել էին, որ սպանված հայազգի զինվորն ու Քըվանչ Աղաօղլուն մոտ ընկերներ էին։

Թեքքանաթը նման բան չի պնդել, սակայն չի էլ նշել, որ երկու զինծառայողների միջև հարաբերությունները լարված են եղել։
 

http://tert.am/am/news/2012/12/21/sevag-tekkanat/