«Այլընտրանքային ցուցադրության» հնարավորություն տալ Թուրքիային, կնշանակի խրախուսել թուրքական ժխտողականությանը

ՀԱԿՈԲ ՉԱՔՐՅԱՆ

Հայտարարում են թուրք մտավորականները` նախազգուշացնելով Դանիայի թագավորական գրադարանին:

Նոյեմբերի 19-ին «Ազգը», «Դանիական մամուլում տպագրվել է թուրք գիտնականների նամակ-բողոքը Թուրքիայի ժխտողականության քաղաքականության դեմ» վերնագրով, տեղեկացրել էր, որ Դանիայի թագավորական գրադարանը որոշումով որպես այլընտրանքային տարբերակ Հայոց ցեղասպանության ցուցադրության, թուրքական կողմին տրամադրել է Ցեղասպանության ժխտողականության ցուցադրությունը ներկայացնելու հնարավորություն:

«Ազգը» այդ մասին տեղեկացել էր «Արմենպրեսի» հաղորդագրությունից, որին էլ իրազեկել է Հայոց ցեղասպանության թանգարան-ինստիտուտի տնօրեն Հայկ Դեմոյանը` ընդգծելով, որ թուրք գիտնականների նամակ-բողոքը` ընդդեմ գրադարանի տնօրենության, լայն արձագանք է գտել դանիական հասարակության մեջ:

Sesonline.net կայքէջն էլ նույն օրը հրապարակեց դանիական մամուլում տպագրված նամակ-բողոքի տեքստն ու այն գիտնականների անունը, որոնք ստորագրել են նամակը` նախապես տեղեկացնելով, որ Դանիայի թագավորական գրադարանը թուրքական կողմին Ցեղասպանության ժխտողականության թեման ներկայացնելու հնարավորություն է տվել Թուրքիայի կառավարության դիմումի հիման վրա, որին նամակ-բողոքով արձագանքել են թուրք մտավորականները:

Նամակում ասված է. «Ցավում ենք, որ Դանիայի թագավորական գրադարանը, որպես այլընտրանք, Հայոց ցեղասպանության ցուցադրության թուրքական կառավարությանը «այլընտրանքային ցուցադրություն» ներկայացնելու հնարավորություն է տվել: Ճիշտ չեն այն տեսակետները, թե 1915 թ. իրադարձությունների շուրջ երկու տարբեր թեզ կամ կարծիք գոյություն ունեն: 1915 թ. ավելի քան 1 մլն օսմանահպատակ հայեր տեղահանվել են հայրենի օջախից եւ գիտակցաբար ոչնչացվել` որդեգրած քաղաքականությամբ: Թուրքական կառավարության արարքն այսօր ոչ այլ ինչ է, քան պատմական իրողությունը ժխտելու հերթական դրսեւորում:

Պատմության հետ առերեսումը ժողովրդավարության անվերապահ նախապայմանն է, իսկ Թուրքիայում կառավարությունները ավելի քան 90 տարի շարունակ ճշմարտությունը քողարկում եւ վարում են ժխտողականության քաղաքականություն: Նրանք հետեւողականորեն հալածում եւ ճնշում են սեփական պատմության հետ առերեսման կոչ անող մտավորականներին, որոնցից էր 2007 թ. սպանված Հրանտ Դինքը:

Տալով թուրքական կառավարությանը «այլընտրանքային ցուցադրության» հնարավորություն` դուք, փաստորեն, խրախուսում եք մտավորականներին հալածելու եւ ճնշելու նրա քաղաքականությունը: Պատմության հետ առերեսումից համառորեն հրաժարվող եւ ժխտողականությունը սկզբունք դարձրած կառավարությանը ցուցաբերած ձեր աջակցությունը համարժեք է ռասիստական վարչակարգերին ցուցաբերվող աջակցությանը: Հիշեցնենք, որ այս վերաբերմունքով դուք խոչընդոտ եք հանդիսանում Թուրքիայի ժողովրդավարացմանն ուղղված նախաձեռնություններին: Պատմությունը ժխտելու Թուրքիայի դիրքորոշումը միաժամանակ խոչընդոտ է Միջին Արեւելքի խաղաղության, ժողովրդավարության ու կայունության համար: Գրադարանից պահանջում ենք անհապաղ վերանայել Թուրքիային «այլընտրանքային ցուցադրության» հնարավորություն տրամադրելու մոտեցումը»:

Նամակը ստորագրել են Թաներ Աքչամը, Ջենգիզ Աքթարը, Ահմեդ Ալթանը, Մուրադ Բելգեն, Հալիլ Բերքթայը, Իսմայիլ Բեշիքչին, Ֆաթմա Մյուգե Գյոչեքը, Օմեր Լաչիները, Բասքըն Օրանը եւ այլք: Նրանց թվում են Դիարբեքիրի քաղաքապետ Օսման Բայդեմիրը եւ Թուրքիայի Ազգային մեծ ժողովի քուրդ պատգամավոր Սըրրը Սաքըքը:

http://azg.am/AM/2012122108