Կիրո Մանոյան. Թուրքիան եւ Ադրբեջանը Հայոց ցեղասպանությունը վարկաբեկելու ամեն ջանք կգործադրեն

Հայոց ցեղասպանության 100-ամյա տարելիցի նախաշեմին Թուրքիան եւ Ադրբեջանն այդ պատմական իրադարձությունը վարկաբեկելու ամեն ջանք կգործադրեն այն երկրներում, որոնք դեռ չեն ճանաչել Ցեղասպանությունը: Այդ մասին դեկտեմբերի 19-ի մամուլի ասուլիսում հայտնել է Հայ դատի գրասենյակի ղեկավար եւ ՀՅԴ բյուրոյի անդամ Կիրո Մանոյանը:

Ըստ Մանոյանի՝ Հայաստանի նպատակը ոչ միայն Հայոց ցեղասպանության ճանաչմանը հասնելը պետք է լինի, այլեւ դրա հետեւանքները վերացնելու հարցը: «Ցեղասպանության հետեւանքների վերացման հարցի լուծումը պետք է դառնա ամբողջ հայությանը միավորող խնդիր: Հայաստանի նախագահը այդ հարցը մի անգամ բարձրացրել էր 2010թ. դեկտեմբերին, մինչդեռ այդ հարցն ավելի կարեւոր է Ցեղասպանության ճանաչումից, քանի որ շատ երկրներ արդեն ճանաչել են այդ պատմական փաստը»:

Ըստ Մանոյանի կանխատեսումների՝ մինչեւ 2015թ. կնվազի այն երկրների թիվը, որոնք դեմ կարտահայտվեն  Հայոց ցեղասպանության ճանաչմանը: «Օրինակ, ԱՄՆ-ի օրենսդիր մարմինը, որը բազմիցս ճանաչել է Ցեղասպանությունը, փորձեր կձեռնարկի երկրի  գործադիր մարմնի վրա ազդելու համար: Կնվազի նաեւ այն երկրների թիվը, որոնք չեն ճանաչում Ցեղասպանությունը՝ ելնելով Թուրքիայի հետ լավ հարաբերություններից»:

http://news.am/arm/news/133116.html