«Nouvelles d”Arme’nie»-ի փոխանցմամբ` նախորդ կիրակի Օ’դը Սենի գլխավոր խորհրդի նախագահ, հայազգի Պատրիկ Դեւեջյանը հաղթել է 13-րդ օկրուգում կայացած պատգամավորական ընտրություններում: 60.03 տոկոսով նա առաջ է անցել իր մրցակից Ժյուլիեն Լանդֆրիդից, որը ստացել էր ձայների 39.97 տոկոսը: Այս տարի Դեւեջյանը երկրորդ անգամ է մասնակցում ընտրությունների եւ հաղթում: Առաջինի ժամանակ Սոցիալիստական կուսակցության աջակցությունը վայելող Լանդֆրիդը Դեւեջյանին զիջում էր 191 ձայնով: Սակայն այդ ժամանակ Սահմանադրական խորհուրդը Դեւեջյանի ընտրությունը չեղյալ համարեց, եւ երկրորդ անգամ նշանակված ընտրություններում Դեւեջյանն ապացուցեց իր ժողովրդականությունը: Դեւեջյանն այդ օկրուգից պատգամավոր է ընտրվում 1988-ից ի վեր:
68-ամյա Դեւեջյանի քաղաքական կարիերան սկսվել է դեռեւս ուսանողական տարիներից, երբ նա դարձավ աջակողմյան կուսակցության անդամ: Դեւեջյանը Սարկոզիի գաղափարակիցներից էր: 2002-2005թթ. նա Ֆրանսիայի տնտեսական զարգացման նախարարն էր:
Ֆրանսահայ քաղաքական գործիչը միշտ էլ հպարտացել է իր հայկական արմատներով եւ պահպանել հարաբերությունները Հայաստանի եւ Ֆրանսիայում հայ համայնքի հետ:
Նա Ֆրանսիայում Ցեղասպանության ճանաչման առաջամարտիկն է եղել եւ իր հարցազրույցներում միշտ անդրադարձել է այդ թեմային:
Նախորդ տարի, երբ Ֆրանսիայի Սահմանադրական խորհուրդը հակասահմանադրական որակեց Սենատի` Հայոց ցեղասպանության ժխտումը քրեականացնող օրինագիծը, Դեւեջյանը թուրքական «Միլիեթ» թերթին տված հարցազրույցում ասաց, որ չի հուսահատվել կամ հիասթափվել: Թուրք լրագրողի հարցին` ինչքա՞ն է պայքարելու օրինագծի ընդունման համար, Դեւեջյանն ասել է. «Մինչեւ մահ: Սա շատ հոգնեցուցիչ է, սակայն պատվի խնդիր է»:
2010-ին այցելելով Հայաստան` Դեւեջյանը «Հայաստան» համահայկական հիմնադրամի գրասենյակում կայացած հանդիպմանը կարեւորեց Հայաստան-Սփյուռք համագործակցությունը` շեշտելով, որ այսուհետեւ ամեն տարի 500.000 եվրո դրամաշնորհ կտրամադրվի Հայաստանին` միտված գյուղատնտեսության զարգացմանը:
Այդ գումարով Տավուշի մարզում 15 կմ երկարությամբ ջրանցք է բացվել, որը կրում է «Հայ-ֆրանսիական բարեկամություն» անունը: Այդ ջրանցքի շնորհիվ Տավուշի մարզի Խաշթառակ, Լուսահովիտ եւ Դիտավան համայնքների ավելի քան 600 հեկտար հող արդեն ոռոգվում է:
Leave a Reply