Ստամբուլի պատմական «Հայկական աղբյուրը» վերադարձվել է հայկական եկեղեցու հիմնադրամին

Ստամբուլի նահանգի Սարըյեր շրջանի Բոյաջըքյոյ գյուղում գտնվող պատմական «Հայկական աղբյուրը» վերադարձվել է Պոլսո Երից Մանկանց հայկական եկեղեցու հիմնադրամին: Ինչպես հաղորդում է «Արմենպրես»–ը, թուրքահայության հիմնադրամների խորհրդի ղեկավար Նազարեթ Օզսահակյանը հայտնել է, որ նման արդյունքի իրենք հասել են 12 տարվա համառ պայքարի արդյունքում: Նա նշել է, որ աղբյուրի հայկական պատկանելությունը հիմավորելու համար հարկադրված են եղել բազնաթիվ վավերագրեր ներկայացնել, ինչից հետո է այն վերադարձվել իրական տերերին:

1949 թ. Թուրքիայի անշարժ գույքի վարչությունն աղբյուրն ապօրինաբար դրել է Սարըյերի քաղաքապետարանի ենթակայությանը, որից հետո այն զրկվել է ամենօրյա խնամքից եւ սկսել քանդվել: «Մենք վերանորոգման աշխատանքներ կիրականացնենք աղբյուրը` նախկին տեսքին բերելու համար», -ասել է Օզսահակյանը:

«Հայկական աղբյուրը» 1843 թ. կառուցել է սուլթան Մահմուդ Երկրորդի հարկահավաք Միսակ Միսակյանը, որը նա նվիրել է իր հոր` Պետրոս Միսակյանի հիշատակին:

http://armenpress.am/arm/news/703103/stambuli-patmakan-haykakan-axbyury-veradardzvel-e.html