Թուրքական Anadolu-ն հայազգի Արա Գյուլերին անվանել է «լուսանկարչության ապրող լեգենդ»

Թուրքական Anadolu լրատվական գործակալության` 2012 թ. լավագույն լուսանկարի ընտրության մրցույթին մասնակցել է նաեւ Թուրքիայում բնակվող հայազգի հայտնի լուսանկարիչ Արա Գյուլերը: Ինչպես հաղորդում է «Արմենպրես»-ը` թուրքական Anadolu-ն մրցույթի մասին պատմող հոդվածում հայազգի լուսանկարչին անվանել է «լուսանկարչության ապրող լեգենդ»: Գյուլերը մրցույթին ներկայացված 36 լուսանկարներից քվեարկել է Բանգլադեշում աղոթող երեք մուսուլման երեխաների նկարի օգտին: Նա բարձր է գնահատել նաեւ մուսուլմանների կյանքից մի դրվագ պատկերող նկարներից մեկը, ինչպես նաև` զոհված զինվորի դիակն իջեցնող ուղղաթիռի լուսանկարը:

Քվեարկության ներկայացված լուսանկարների թվում է նաեւ Թուրքիայի մշակույթի եւ զբոսաշրջության նախարարության կողմից «Մշակույթի եւ արվեստի ոլորտում մեծ պարգեւ»-ի հանձնման հանդիսավոր արարողության ժամանակ արված մի լուսանկար, որտեղ Թուրքիայի վարչապետ Ռեջեփ Թայիփ Էրդողանը լուսանկարում է դարի լավագույն լուսանկարիչ, պոլսահայ Արա Գյուլերին:

Հանրության դատին ներկայացված 36 լուսանկարների շարքում արտացոլված են Թուրքիայում եւ աշխարհում տեղի ունեցած իրադարձություններ, մարդկային ողբերգություններ, զարգացումներ եւ բնության տեսարաններ:

http://armenpress.am/arm/news/703086/turqakan-anadolu-n-hayazgi-ara-gyulerin-anvanel-e-lusankarchutyan.html