Թուրքիայում «ծպտյալ» հայկական գործոնը քաղաքական մեծ ներուժ ունի

Մարգար Եսայանի` ԹԱՐԱՖ թերթի խմբագրի պաշտոնին նշանակումը կապ ունի Ստամբուլի համար պայքարի հետ:

Armweeklynews.am-ն արդեն տեղեկացրել էր, որ այն բանից հետո, երբ հրաժարական էին տվել ԹԱՐԱՖ թերթի գլխավոր խմբագիր Ահմեթ Ալթանը և խմբագրի տեղակալ Յասեմին Չոնգարը, ԹԱՐԱՖ թերթի ժամանակավոր գլխավոր խմբագրի պարտականություններն ստանձնել էր Մարգար Եսայանը: Սակայն դրանով անակնկալները չեն ավարտվում:

Թուրքիայում լրագրողական կուլիսներում շրջանառվում է այն տեսակետը, որ Ստամբուլի Շիշլիի քաղաքապետ Մուսթաֆա Սարըգյուլը գնել է ԹԱՐԱՖ օրաթերթը և պահանջելով թերթի ղեկավարության հրաժարականը, նոր խմբագիր է նշանակել «հավատարիմ մարդու»:

Թուրքիայի լրագրողական համքարությունը պնդում է նաև, որ առաջիկայում Մուսթաֆա Սարըգյուլը կա’մ Ստամբուլի քաղաքապետի պաշտոնի համար կառաջադրվի, կա’մ էլ` կփորձի դառնալ ընդդիմադիր Հանրապետական ժողովրդական կուսակցության`CHP-ի նախագահ` այդ պաշտոնում փոխարինելով Քեմալ Քըլըչդարօղլուին:

Armweeklynews.am-ը մի քանի անգամ հրավիրել է ընթերցողների ուշադրությունը Շիշլիի քաղաքապետ Մուսթաֆա Սարըգյուլի քաղաքական նկրտումների վրա, որոնք հասնում են մինչև Թուրքիայի նախագահի պաշտոնը:

ԱլինՀակոբյան (Alin Gündoğan)/Ստամբուլ

http://www.armweeklynews.am/awn/mn12/mn_1281.htm